MSL-6 BCA-in a vawi thumna'n champion an tum

Mizoram Super League season 6 a hnai, tualchhung basketball inelna lian leh sang ber hi February 25, Thawhlehni aṭang hian Hawla Indoor Stadium, Republic Vengthlangah khelh ṭan a ni dawn. Champion lai Zarkawt BCA chuan a lungthu kim nan nomawi humhim an tum.

MSL season hmasa pahnihah Khatla TBL an champion a, season thumnaah a vawi thum nan champion tum mah se Mission Veng Vikings an ngam lo; inelna hnuhnung pahnihah Zarkawt BCA hi chungnung berin club dangin an tih theih ngai loh a zawna vawi thum champion an tum dawn a ni.

Zarkawt BCA hian tun season MSL-a an match hmasa ber atan February 27, Ningani zan hian team thar Ramhlun Sporting Club an hmachhawn ang.

Zarkawt BCA coach Lalruatfela chuan, "A zawna vawi thum champion chu a harsa ang tih kan ring, mahse kan tum dawn a ni," tiin Vanglaini a hrilh. BCA hian an player neih ṭhat ho an kawl chhunzawm deuh vek avangin beiseina an nei sang hi a mak lo.

Season hmasa lama an neih Dennis Lalmuanpuia (Tuikual South) leh Jackson Lalrintluanga (Chawnpui) te an chhuak a, Tuikual aṭangin K. Vanlalruata leh Lalrinzual Hnamte te an lalut thung. Lunglei tlangval Rinmuanpuia Chhangte an neih belh bawk.

Afela chuan, "Kan player neihsa deuh vek an ni, an inkhelho rei tawh a, an in man hlawm bakah inbuatsaihna kan neih ṭhat avangin beiseina kan nei sang," tiin a naute chungah rinna an nghah ngam thu a sawi.

MSL season hnuhnung pahniha Most Valuable Player ni thei Lalrina Renthlei an neih avangin BCA hi an chhe dawn lo tih a hriat a, Ramthar tlangval Zonunsanga leh captain Matthew Remtluanga Sailo te pawh tualchhung player ṭha bik an ni.

State dang player pahnih a lak theih a, India ram pawn player pakhat a lak theih bawk. MSL hmasa lam kan hmelhriat tawh Sowkin Shetty kan hmu nawn dawn, Gujarat player Sahaj R. Patel pawh inelna tir aṭangin a inlan theih a rinawm.

Player hmuhnawm bik tura ngaih Shawntrez Gernard Davis erawh ziah lan ni tawh mah se a inlan dawn lo, amah thlak turin player ṭha dang an la dawn. Afela chuan, "A la chiang chiah lo, a ṭha leh hmuhnawm bik chu a ni ang," tiin an player thar tur chungchang a sawi.