Didika hoin East Bengal chak

Mangchhia lak ata talchhuah tumin East Bengal-in hnehna an chang ve leh ta a, Thawhṭanni zan khan Indian Arrows chu 3-1 in an hneh - Kolkata club goal hnuhnung ber hi Lalrindika Ralte khung a ni. 

East Bengal tana minute rukna leka Jaime Santos goal khung chu Arrows hian Vikram Pratap Singh hmangin an chhanglet a, result ṭha nei thei lo East Bengal fan-te an hlauthawng hman. 

Mahse, minute 62-naah Ahseer Akhtar chuan Kolkata club tan goal rawn khung ve lehin hma a hruai nawn pui a, an hawikir tawh lo - Didika'n minute nga hnuah chak nemnghehna goal a khung a, Mizo goalkeeper Lalbiakhlua Jongte-in Arrows tan a dang thei lo. 

Lunglei tlangval Didika goal hi corner aṭanga lut a ni a, East Bengal captain hi midang zawng aia zuang sangin Jaime Santos-a corner pet chu a tauh lut a ni. 

East Bengal hian match 12 aṭangin point 15 an nei a, paruknaah an awm mek. Vawiin tlai dar 5:00-a Churchill Brothers lenchilh tur Real Kashmir-in hnehna an chan chuan pasarihnaah an tla leh thung ang.