United laka Auba goal Arsenal tan a hlu

Manchester United-in an mikhual Arsenal lakah point thum hlu tak hlawhchhuah theih inbeisei mah se, manager Ole Gunnar Solskjaer hote hian Pierre-Emerick Aubameyang leh Video Assistant Referee (VAR) an dang thei lo.

Thawhṭanni zan Premier League inkhelah Man United leh Arsenal te 1-1 in an inhnehtawk, chawlhlawk hma chiaha midfielder Scott McTominay-a goal ṭha tak chu second half-ah Auba-a'n a sut. Gabon international goal khung hi assistant referee-in offside-ah ngai mah se VAR chuan dan ang thlapa goal tih nemnghetin a pawm sak.

Arsenal hian point 12 neiin a sang pali zingah an inhlangkai leh ta chiah. Man United erawh 10-naah awmin point kua chiah an la nei, 1989-90 season hnua a vawi khat nan league match hmasa pasarih aṭangin point 10 an hmu tling lo, hemi kum hian 13-na ni chungin season an khar.

English club ropui pahnih hi an ṭhat vanglai a ni rih lo a, tun hma lama manager ropui Sir Alex Ferguson leh Arsene Wenger te hunlai leh tuna an dinhmun chu khaikhin chi pawh a ni lo. Chutihrualin Solskjaer leh Unai Emery ten player naupang rual an chhawr nasat avangin a hlutna lai a awm.

Old Trafford-ah goal kan hmu har, Gunners lam corner pet chu United lamin chang fuhin counter attack aṭangin na takin an nawr. Player tlan chak Daniel James-a cross chu Marcus Rashford-a'n a pet hman loh avangin North London club hi himah an inngai.

Mahse, English striker hian box pawna vengtu nei lo Mc Tominay a pe, Scotland international hian defender leh keeper inrin loh karah goal lama pet thutin Bernd Leno tan dan hman a ni lo. Defender Sokratis Papastathopoulos leh captain thar Granit Xhaka ten an hmaa ball kal an dan loh vang tiin a sawi theih.

Minute 58-ah Axel Tuanzebe chuan mual sir aṭangin a laiah ball a pe phei a, Arsenal tan rawlthar Bukayo Saka chuan lo chang fuhin, Europa League-a goal hnih khung hlim hian a hma a awm Aubameyang a pe zui. Auba hian Victor Lindelof leh Ashley Young te inkar aṭangin David de Gea dan theih lohin 'cool' zetin a khung.

Manchester United tan Marcus Rashford a dam hman avangin rawlthar Mason Greenwood chu bench-ah a ṭhu ta thung. Midfielder pawimawh Paul Pogba-a'n inkhel bul a ṭan thei bawk a, France international hi United midfielder zingah tlarhma a awm Rashford tana through ball pet dik chat chat thei awmchhun ang hial a ni! Hun tawp dawn lama box pawn aṭanga a ball pet ṭha tak lut ni se team tan a hlutna a sang zual khawp ang.

Aaron Wan-Bissaka awm loh karah captain Young a inlan a, kum 34 mi Young hi a vanglaia right midfielder vantlang kha niin right back-ah erawh vantlang hnuai lam a ni. Ole Gunnar Solskjaer-a'n hliam dam hlim Rashford a ring ngam a, England international freekick pet ṭha zet chu Leno-a'n a dansak.

Defender manto ber Harry Maguire-a'n Leno tan hna hautak zet siamsak mah se goal an chhuah dawn a Auba-a offside loh chhan a ni. Leicester City defender hlui leh Lindelof te dinna laiah Gunners striker a put tlang a, an man zat phu tawkin an khel chhuak lo.

Nipui bazar laiin Arsenal hian an club player manto ber ni turin Nicolas Pepe an lalut a, tun thleng chuan an beisei a la phak rih lo. Lille player hlui hian goal khung theina hun ṭha nei mah se a pet over luah a, a vawi hnihnaah a pet na tawk lo bawk.

Ivory Coast international hian Auba-a'n penalty a pettir khung tawh mah se, pound maktaduai 72 senga an lakluh hlim boruak leh Liverpool defender Virgil van Dijk a tlan pelh lai khan Gunners fans a tih hlim lai ber a ni rih mai awm e. Minute 72-naah rawlthar Reiss Nelson chuan a rawn thlak a ni.

Arsenal tan Bukayo Saka chu United laka inkhel bul ṭantu naupang ber a ni. Kum 18 leh ni 25 mi hi a che rangin a tlan chak a, an goal neih chhun a siamsak a nih bakah amah vengtu Young a chhaih buai thei hle - goal khung theihna hun a neihah erawh De Gea a paltlang zo lo.