Court chhungah Clijsters a rawn kir

Kim Clijsters chuan harsatna nei loin tennis a khel leh thei ta. Thawh-ṭanni zan khan Clijsters hi Dubai Tennis Championships-ah a inlan a, a khingpui Garbine Muguruza lakah chak lo mah se a chanchinin ngaihven a hlawh hle.

Australian Open finalist Muguruza hian kum 36 mi Clijsters hi 6-2, 7-6 (8-6) in a hneh a, inkhel inhnehtawk takah Spain nula hian set hnihnaah a service vawi hnih hloh mah se huaisen taka tho chhuak lehin hnehna a chang.

Belgium nula Clijsters hian 2007 khan a vawi khat nan tennis a chawlhsan tawh, 2009 khan rawn kir lehin Flushing Meadows leh Australian Open-ah ropui takin hlawhtlinna a chang - mahse hliam leh mimal harsatna hrang hrang vangin 2012 khan a vawi hnih nan a chawl.

Tunah chuan Clijster hian fa pathum a nei tawh a, nikum September thla khan a rawn kir leh tur thu sawi mah se a tum ang hunah a rawn kir mai thei lo. World number 1 hlui hi Dubai-ah hian duhsak taka wildcard pek a ni.

Grand Slam vawi hnih champion tawh Muguruza chuan Clijsters chu fakin, "Player theihna nei sang tak chuan match ropui dang pawh a khel leh thei ang," tiin a sawi. Muguruza hian season bul a ṭan fuh a, Wimbledon leh French Open nomawi a chawi tawh chu kuminah chawi nawn leh a tum ang.