Chelsea fans chungah Jorginho lawm

Maurizio Sarri-a'n Chelsea a enkawl dawna Napoli aṭanga a chhawm Jorginho chuan Blues fan-te thinlung a hneh chho ta nia a inhriat thu a sawi a, "Ka lawm takzet a ni," a ti. 

Kar hmasa Premier League-a Blues-in Brighton an hneh ṭum khan 'Jorginho' tih hming lamin fan-te an zai a, Italian midfielder tan ngaihthlak nuam bik a ni. Jorginho chuan, "Season hmasa kha chuan hetiang thil hi a thlen theih a beiseiawm lo a, fan-te thinlung ka hneh ve ṭan ta nia ka hriatna hian minti lawm hle a ni," a ti. 

"Ka thawkrim em em a, ka chanchin an sawi lai zawng zawng khan theihtawp chhuahin ka bei reng a, ka chhanglet lo. Tun season hi Sarri vang chauha he hmun lo pan ka ni lo tih pholanna ṭha tak a ni," tiin a sawi. 

Jorginho hi Frank Lampard enkawlna hnuaiah pawh player pawimawh a ni phak a, Chelsea midfield khaidingtu ber a ni tawh.

Tun season-ah Blues tan match kua khelin goal hnih a khung a, assist vawi khat a nei. Zanin dar 12:30-ah Champions League match khelin Lille an lenchilh dawn a, French club lakah a thiamna a pawimawh ang. Blues hian group H-a an match hmasa berah Valencia an lo ngam lo tawh a, insiamṭhat an mamawh. Spanish club Valencia hian zanin dar 12:30-ah vek season hmasa semifinalist Ajax an mikhual dawn a, inkhel hmuhnawm a beisei ngam.