Bengaluru leh Rangers thawkdun dawn

Indian Super League club Bengaluru FC chuan Scottish club ṭha Rangers an thawhpui dawn a, club pahnih hian kum hnih chhung atan inremna an ziak - contract hi pawhsei leh theih a ni bawk ang. 

Inremna ang chuan Rangers hian sumdawnna lama hma an sawn theih nan Bengaluru chuan India lamah Scottish club hi an pui ang a, anni lam hian Indian player talent nei ṭhate chu chher chhoh dan tur an ngaihtuah thung dawn a ni. 

Rangers academy-te chu India-ah rawn zinin Bengaluru training ground-ah hun an hmang ang a, Bangalore club-a Indian player ten Rangers nena training an neih ho theih dan tur ruahmansak an ni bawk. Stevn Gerrard enkawlna hnuaia khel mek Rangers-ah hian Sunil Chhetri leh Mizo tlangval Jeje Lalpekhlua te chuan trial an lo nei tawh.