Hmachhawp ropui zawk thlirtu Wijnaldum

Liverpool midfielder Georginio Wijnaldum chuan season hmasa Champions League nomawiah an duhtawk loh thu a sawi a, "Kuminah pawh final khelh leh ngei kan tum a ni," a ti. 

Wijnaldum hian season hmasa Barcelona laka an 'comeback' theih nan goal hnih a khung a, Reds-in 2005 hnua Champions League nomawi an chawi theih nan a thawhhlawk hle. Dutch midfielder chuan, "Kan hun tawn kha thlirlet ila, a hlimawm em em a ni. Mahse, tun hi hun liam tawh sawi hun a ni tawh lo a, season hmasa aia ropui lehzuala khel tura kan inbuatsaih a ngai a ni," a ti. 

Liverpool hian zanin dar 12:30-ah Champions League match khel turin Red Bull Salzburg an mikhual dawn a, hnehna chan an mamawh. Group E inkhelah Liverpool hian Napoli chu an match hmasa ber an lo khelhpui tawh a, khualmualah 2-0 in an tlawm. Zanin dar 10:25-ah Napoli hian Genk an lenchilh thung ang. 

Kum 28 mi midfielder chuan, "Season hmasa sawi a hun tawh lo. Engkim a danglam tawh a, team leh thil thlen dan thlengin a danglam tawh a ni," tiin a sawi. Champions League final hi Istanbul khawpuiah khelh a ni dawn a, Liverpool fan-te chuan Turkey khawpui pakhat hi an theihnghilh theiin a rinawm lo. 

Kum 2005 khan AC Milan nen Champions League final-ah an intawng a, 3-0 a an hnufual hnuin Steven Gerrard hoin an comeback - a tawpah penalty hmangin an chak. Liverpool fan-ten Istanbul zin leh an beisei ang a, Champions League nomawi chawi leh an mangphan ang.