Thangmawia'n bronze a la
National Classic Championship 2019, Idduki, Kerela-a neihah Lalthangmawia'n 66 kg category-ah bronze medal a la. Mizoramin powerlifting inelna senior level-a medal an lak hmasa ber a nih avangin Mizoram Power Lifting Association tan hun chinchhiahtlak a ni.
Inelna hi September 26-30 chhung khan neih a ni a, Mizoram aṭangin lifter paruk telin manager C. Lalramzaua'n (Chanmari West) a hruai. Mizoram tana medal latu Thangmawia hi Bungkawn High School Venga awm a ni a, Mizoram chhung inelnaah ṭum hnih strongman atan thlan a ni tawh.
Thangmawia hian national level-a bronze medal a lak hma hian NorthEast Powerlifting C'ship-ah gold medal a la tawh bawk. Mizoram aiawha kal dangin medal an hlawh chhuak lo a, Saron Veng tlangval Lalhmangaihsanga chu hliam vangin a chawi tluan thei lo. Hmangaihsanga hian nikum khan sub junior-ah gold a la a, tun ṭumah hian junior inelnaa tel tur a ni.
MPA general secretary Reuben Lalthanchhunga Sailo chuan, "Senior level-ah medal vawi khat lakna chauh ni mah se kan lawm ve khawp mai. Inelna lehpekah tun aia tam lak tumin ṭan kan la ang," tiin Vanglaini a hrilh.
Lalthangmawia Record
2018
NE Powerlifting Championship, Silchar-ah gold medal a la (59kg).
State Powerlifting C'ship-ah gold medal a la a, strongman award a dawng tel bawk. (59kg)
National Classic Powerlifting C'ship-ah pangana (5-na) a ni. (59kg)
2019
Northeast Powerlifting C'ship-ah gold medal a la (66kg)
Eastern Powerlifting C'ship-ah silver medal a la (66kg).
Mizoram Open Powerlifting C'hip-ah gold medal a la (66kg).
Inter Dist Powerlifting C'ship-ah gold medal a la a, strongman award a dawng tel bawk (66kg).
Mizoram aiawha kalte
Junior
1 Lalremliana Ṭhangte 59 kgs
2 C. Lalremtluanga Chaltlang 66 kgs
3 Lalhmangaihsanga Saron Veng 105 kgs
Open/Senior
1 Lalthangmawia Bungkawn 66 kgs
2 F. Lalmawipuia Ramthar 93 kgs
3 K. Malsawmdawngliana Lunglei 120 kgs
Manager C. Lalramzaua, Chanmari West