Kolasib lamah MPL Round 6

Mizoram Premier League Season 8 round 6 chu Kolasib khawpuiah nghah a ni dawn. October 18-19, 2019 hian Kolasib District Football Association chuan he inkhel hi a thleng dâwn a ni.

MPL hi Season 5 aṭangin Aizawl pawnah 'Round' khat khelh chhuah ṭhin a ni. MPL5 hi Champhai lamah khelh a ni a, MPL6 inkhel hi Lungleiah nghah niin MPL 7 hi Serchhip khawpuiin a thleng tawh bawk a, MPL8 hi Kolasib lamin an thleng ve thung ang.

Kolasib District Football Asso-ciation president Vanlalsawma chuan, "Kolasib khawpuia MPL inkhel nghah a ni tur hi kan lawm a, kan phur tawh khawp mai. KDFA-in a ṭha thei ang bera thlen kan tum dawn a, Kolasib mipui mai ni lo, kan district chhunga mipui zawng zawng inkhel en turin kan sawm lawk duh a ni," a ti.

MPL Board chairman PC Vanlalhruaia chuan, "MPL hi Mizoram hmun hrang hranga khelh hi kan duh a, kan sum neih milin round khat zel hi Aizawl pawnah kan khel ṭhin. Player-te hi Mizoram kil tin aṭanga kal khawm an nih angin Mizoramah hian a zau thei anga inkhelh kual hi kan duh dan a ni a, sum kan neih ang zelin kan inzar pharh chho zel ang," tiin a sawi.

Mizoram Premier League hi Santosh Trophy vanga chawlh a nih hnuah October 3, Ningani hian khelh ṭan a ni leh dawn. Match hnih khelh tawhah Mizoram Police chuan vawi hnih hnehna changin hmahruaitu an ni.