Edris-a'n 5,000m world title humhim

World Athletics Championships 2019 neih lai mekah Muktar Edris chuan 5,000m world title a kawl lai a humhim a, gold medal hlawh chhuak tur hian intlansiak tawp lam 200m chhung vel chu an inum na hle.

Thawhṭanni zana inelna neihah kum 25 mi Edris hian minute 12 leh 58.85 seconds chhungin a thleng a, a hnungah hian Selemon Barega a thleng ve thung - pakhatna nih tuma an inum boruak san vanglaiin Ethiopian fans lamin Edris hi an au phur nasa hle a ni.

Kuminah hian Mo Farah a inlan ve tawh lo, Britain tlangval hian a zawna vawi thum a champion hnuah inelna hnuhnung berah khan Edris hi a ngam lo. Tunah chuan Ethiopia tlangval hi 5,000m roreltu thar a ni ta. Qatar khawpuia neih World Athletics Championships 2019-ah hian ram 209 aṭangin infiammi 1972 zet an inlan a, nimin tlai thleng kha chuan ram hrang 25 ten medal an la tawh. India chuan medal a la hlawh chhuak rih lo a ni.

Kumin World Athletics Championships 2019 hi season dang angin fans lamin an hlut tawk loin a lang a, International Association of Athletics Federations chuan pawi an tih thu leh infiammite tan erawh a hlutna a ngai reng tih an sawi.

Hawnna neih zan khan Khalifa International Stadium-ah mipui 13,288 chauh an pungkhawm a, a hnu lamah stadium chhunga inelna entu an tlahniam mek zel. Thawhṭanni zan a thlen meuh chuan kum dang nena khaikhin phei chuan fans an tlem tawh hle.

IAAF chief executive Jon Ridgeon chuan, "Stadium chhunga ṭhutna hi 65-70% vel zet a ruak ṭhin a, hei aia entu tam zawk hi kan duh a ni. Tualchhung thuneitu lam pawh fans an pungkhawm tam theih nan an thawkrim hle," a ti.