Andreescu a chak hram

US Open hmeichhe singles champion Bianca Andreescu chuan Thawhṭanni zan khan China Open lamah inelna bul a ṭan a, fiahna hautak paltlang nghalin Aliaksandra Sasnovich a hneh.

Kum 19 mi Andreescu hi New York khawpuia a hlawhtlin hnuah a chawl hahdam, tun ṭum hi match a neih lehna hmasa ber a ni chauh. Inkhel hautak takah 6-2, 2-6, 6-1 in a chak, vawi 31 ngawt unforced errors a neih chu insiam

ṭhat a mamawh hle.

Inkhel dangah world number 1 hlui Venus Williams leh Simona Halep te erawhin beisei an phak lo, player langsar pahnih hi second round paltlang zo loin an zin kawng a tawp. American nula Williams hi seeded pakuana Belinda Bencic lakah 3-6, 6-3, 7-5 in a chak lo. Switzerland nula hian set hnuhnung ber an khelh laiin match point vawi hnih a inchhanhim hnuah hnehna a chang let, a match lehpekah chuan Kristina Mladenovic hnehtu seeded pasarihna Petra Kvitova a hmachhawn leh ang.

Wimbledon champion lai Halep a ropui bik lo. Romanian nula hi seeded pawh chang phak lo Ekaterina Alexandrova lakah 6-2, 6-3 in a chak lo. Kum 28 mi Halep hi a hnungzâng na dam hlim a ni a, a ni zawna match a neih avangin a taksa a la fit tawk lo tih a lang.