Vawiin aṭangin India Vs South Africa

India leh South Africa chuan Test match vawi thum an khelh tura a hmasa ber chu vawiin chawhma dar 9:30 aṭangin Visakhapatnam-ah an khel ṭan ang.

Men in Blue leh Proteas hian Test match khelh hma hian T20 khelin 1-1 in an inhnehtawk. Virat Kohli hote hi mahni muala khel tur an nih bakah Test match an khelh hnuhnun berah West Indies chu an ramah 2-0 a an hneh avangin inrintawkna nasa tak an nei ang.

Nimin khan India hian thutlukna an siam a, wicketkeeper-batsman Rishabh Pant aiah Wriddhiman Saha chu Proteas hmachhawn tura thlan a ni. Kum 34 mi Saha hian thla 22 hnua international match a khel lehna hmasa ber tur a ni ang.

West Bengal wicket keeper hian Test match a khelh hmasak ber chu South Africa nen a ni a, February 9, 2010 daih tawh kha a ni. Test match leh international match a khelh hnuhnun berah pawh South Africa nen tho niin nikum January khan ram tan a inlan.

Catpain Virat Kohli chuan, "Saha hi inkhel turin a inpeih a, series bul min ṭanpui ang. Khelhna chance a neih tawh phawt chuan batting nen lam a khel ṭha ṭhin. Hun rei tak inhliam vanga a khel thei lo hi pawi kan ti. Mimal ngaihdahah chuan khawvela wicket keeper ṭha ber a ni," tiin a fak hle.

Saha hian Test match 32 a khelh tawhah run 1164 siamin 30.63 a average pha. India captain Kohli chuan Saha hi Test cricket-ah chuan number 1 a nih thu a sawi tel bawk.

India-in South Africa lakah hian an bowler neih ṭhat ber Jasprit Bumrah chu inhliam vangin an chhawr thei dawn lo a, tun hmaa India innghahna Ishant Sharma chungah mawhphurhna a tla ang. Men in Blue tan Ishant Sharma leh Mohammed Shami te an pawimawh dawn a, South Africa batsman tawnhriat nei ṭha Hashim Amla a chawlh tawh avangin hmabak a awl sawt a rinawm. Chutihrualin Proteas batsman Faf du Plessis, Aiden Markram leh Temba Bavuma te hi tawnhriat la nei tam lo mah se hmabak nei êng an ni a, ni nga chhung inkhelh tur a nihna laiah hian pace bowler aiin spinner ten danglamna an thlen thei bawk. 

–––––––––––––––––––––––––

India : Virat Kohli (capt), Ajinkya Rahane (vice-capt), Rohit Sharma, Mayank Agarwal, Cheteshwar Pujara, Hanuma Vihari, R Ashwin, Ravindra Jadeja, Wriddhiman Saha (wk), Ishant Sharma, Mohammed Shami