Santosh Trophy Final Round West Bengal leh Mizoram an tel leh ta

Kumin April thlaa khelh Santosh Trophy final round-ah khan champion lai West Bengal leh finalist Kerala te an tel loh avangin boruak a len loh phah a, 2014 champion Mizoram an tel loh lehzel avangin tournament hlutna a tlakhniam phah bawk.

Tun ṭumah erawh vawi 32 champion tawh West Bengal an tling a, Mizoram an chesual nawn lo. Champion lai Services an inpetkai a, South Zone lamin qualifying an la khelh loh avangin vawi ruk champion tawh Kerala hmalam hun a la hriat loh thung.

Final round hi Northeast thlen hun a ni a, kumin kum tir emaw, nakkum kum tirah emaw an khel ang - Mizoram leh Meghalaya-in thlen an dil ve ve ang.

East Zone group A-ah West Bengal hi Odisha leh Bihar nen an awm. Mak takin West Bengal hian Odisha laka 1-6 a chak lo Bihar hi 0-1 in an hneh lo. West Bengal tan final round lut turin Odisha hneh ngei a ṭul a, Kalyani-ah an theihna tak pholangin Odisha 4-0 a sawpin final round an lut.

Group B-ah Jharkhand leh Chattisgarh chiah an awm avangin vawi hnih khelhtir an ni a. Jharkhand-in an intawn hmasakah 2-3 in chak lo mah se match hnihnaah 3-1 a chakin final round an lut hram bawk.

NorthEast-ah Manipur an ṭha ber ṭhin a, tunah chuan pathumna an ni pha ṭawk tawhah a ngaih theih. Kumin kum tira Mizoram ṭahtirtu Meghalaya-in Manipur kawng dal sakin 1-0 in an hneh a, final round an lut. Mizoram pawh chesual nawn tawh loin an group-a awm Arunachal Pradesh (1-0), Tripura (2-1)  leh Assam (2-1) an hneh vek. Coach Lalremtluanga'n Mizoram hi a ho a, kum 2014 hnua a vawi khat nan nomawi chawi an tum ang.

North Zone-ah Punjab-in harsatna an nei lo - Jammu and Kashmir (3-1), Uttarakhand (3-0) leh Haryana (3-0) an hneh vek. Delhi pawhin Uttar Pradesh (4–1), Himachal Pradesh (5-0) leh Chandigarh (3-0) te an hneh a, match thumah point kua an hlawh chhuak ve bawk.

Vawi riat champion tawh Punjab hi kumin kum tira finalist an ni a, 2015 khan semifinal-ah Mizoram an hneh.

West Zone-ah Services leh Maharashtra an awm kawp avangin team ṭha pakhat an tla dawn tihna a ni a, group match hnuhnung berah team pahnih hi an inhmachawn.

Maharashtra-in Services lamah goal an khung hmasa a, amaherawhchu Santosh Trophy champion lai team tan Samthang tlangval PC Lallawmkima'n a chhanglet. Zothanpuia (Thangpuia) hoa ding tlarhnung a phui ṭha a, 1-1 a inkhel tawpin goal difference hmangin Services an tling.

Group B-ah Goa tan harsa a awm lo. West Zone qualifying round thlengtu Goa hian Rajasthan (2-0), Madhya Pradesh (7-1) leh Dadra and Nagar Haveli (14-0) te sawpin an tling.