Zverev tan hna a awlsam

Alexander Zverev chuan China Open-ah bul a ṭan fuh, German tlangval hian Thawhṭanni zan khan a match hmasa berah Frances Tiafoe chu 6-3, 6-2 in a hneh nghal.

Season hmasa ATP Finals champion Zverev hian season duhawm a hmang lem lo, nomawi pakhat chauh la chawiin Grand Slam bikah phei chuan final luhna pawh a nei lo. China khawpui Beijing-ah erawh Zverev hi a khel a nghetin a talbuai lo hle, a match lehpekah chuan Felix Auger Aliassime a hmachhawn leh dawn. Inkhel dangah Aliassime hian Albert Ramos Vinolas chu 6-3, 6-4 in a lo hneh ve thung a ni.

Nimin khan Andy Murray chuan a match hmasa ber a khel a, world number 1 hlui hian Matteo Berrettini 7-6 (7-2), 7-6 (9-7) in a hneh. Hliam vanga hun rei tak chawl tawh Britain tlangval hian kar hmasa khan Zhuhai Championships lamah singles match a lo khel tawh bawk.

US Open khelh zawh taka semifinal lut phak Grigor Dimitrov a che fuh lo thung. Bulgarian tlangval hi 6-2 7-5 in kum 21 mi Andrey Rublev lakah a chak lo. Inkhel inhnehtawk takah Jeremy Chardy chuan Marco Cecchinato 6-7 (7-9), 6-3, 7-6 (7-4) in a hneh thung.

Tualchhung tlangval Zhang Zhizhen chuan Britain tlangval Kyle Edmund 6-4, 3-6, 7-6 (7-5) in a hneh. Zhang hian an rama inelna lian China Open bikah a vawi khat nan hnehna a chang ve chiah.