Hmalam panin Milan an kal zel

AC Milan chuan kawng dik an zawh mek zel a, season thara European football khelh an tum ngam. Thawhṭanni zan Serie A inkhel pakhat awmah Milan hian Ante Rebic goal hmangin Torino 1-0 in an hneh.

Milan hian 2016 August thla hnua a vawi khat nan Torino hi league match bikah an hneh leh chauh, match 24 khelh tawhah point 35 hmuin pariatna dinhmun an luah - palina Atalanta nen an inkarah point 10 a la awm.

Rossoneri (AC Milan sawina) hian Hakan Calhanoglu, Lucas Biglia, Rade Krunic, Leo Duarte te hliam vangin an chhawr thei lo a, hrem vangin Andrea Conti a inlan thei lo bawk; midfielder Lucas Paqueta erawhin thla thum hnua a vawi khat nan bul a ṭan thung.

Thla hmasa mai khan Torino hian Milan hi Coppa Italia quarterfinal-ah 4-2 in an ngam lo, an intawn hnuhnunga inhliam Walter Mazzarri chu a la inkhel thei lo. Hrem vanga Armando Izzo a inlan theih loh laiin damkawr Simone Zaza chu bench lamah dah a la ni.

San Siro-a inkhelah Zlatan Ibrahimovic chuan a tir lamah hun ṭha a nei nghal, kawh tak maia a pet chu keeper Salvatore Sirigu-a'n a lo dang hman hlauh. Sirigu bawk hian Paqueta pet chu a dang hman.

Inkhel thununtu Milan lamin hun ṭha an insiam zel, mual sira ball tlanpuitu Samu Castillejo chuan box chhunga awm Rebic hmu fuhin ball a pe, Rebic hian laklawh nei miah loin a khung - Serie A match a khelh hnuhnung panga aṭanga a goal ngana chiah a ni.

Stefano Pioli kaihhruaina hnuaiah Milan-in hma an sawn zel a, tun hma lama an ropui tawh ṭhinna ang kha neih let leh an tum. Milan manager chaun, "Kan khelh dan leh kan result chu a lawmawm, player tin khan an hnathawh tur ṭheuh ṭha takin an thawk a ni.

"League match khelh hmabak 14 zet kan la nei, tunah chuan Fiorentina nena kan inkhelh tur chauh kan ngaihtuah leh rih ang, May thla kan thlen hma chuan a tam thei ang bera hnehna chan kan tum tur a ni ang," tiin a sawi.

Torino coach Moreno Longo chuan, "Ka naute hian beiseina tlemte chauh pawh nei se an beidawng ve ngai lo, tihtakzeta khel an nih avangin chak lo mah ila kei chuan lawmna tur ka hmu tho, ṭha taka kan khelh miau chuan point thum hmuh hun a awm ang," a ti.

Inelna hrang hranga an match hnuhnung parukah Torino hi an chak lo vek, table-ah pawh 14-na dinhmun an luah phak hram. Tlahniam thei china awm Genoa nen an inkarah point nga chauh a awm vangin insiamṭhat an mamawh takzet.