Conte hoin Inter-in Nou Camp tlawh dawn

UEFA Champions League group stage-ah Barcelona, Inter Milan, Borussia Dortmund leh Slavia Prague te awmna group F hi hmuhnawm ber tura ngaih a ni a, zanin dar 12:30-a Barcelona leh Inter Milan te Nou Camp-a an inkhel tur hi en a châkawm takzet.

Inter Milan hian Catalan club hi ṭum khat chauh an la hneh a, an hneh ṭum erawh khawvelin a hriatpui. Kum 2010 khan Jose Mourinho kaihhruai Inter-in ball possession 30% pawh nei tling loin Lionel Messi telna Barcelona hi 3-1 in an mualah an hneh a, he hnehna hmang hian final lutin an champion zui bawk.

Inter Milan hi Nou Camp-ah ṭum li an lenglut tawh a, an chak loh vek bakah goal khatmah an la khung lo. Conte hoten hnehna chang turin history an thlak danglam a ngai a, Italian manager ngei pawh hi Chelsea a enkawl laiin Nou Camp-ah hian 3-0 in a mualpho tawh.

Barcelona tan Nou Camp hi an kulhpui a ni a, Inter Milan hian chhut chim an tum a nih chuan tun hi a hunlai tak a ni thei ang. Italian club hian Conte hnuaiah harhtharna an chang chho mek a, Serie A match ruk an khelh tawhah la chak vekin league hmahruaitu an ni mek.

Inter hian tun season match sarih an khelh tawhah goal an la khung vek a, goal khung theihna vanga hriat lar Romelu Lukaku leh Alexis Sanchez te hi uanpui tham an tling. Chutihrualin an khelh tawh chinah chuan Stefano Sensi hi an player ṭha ber a la ni rih a, Italian midfielder hian goal thum khung tawhin assist vawi li a nei der tawh.

Amaherawhchu Nou Camp-ah Inter-in goal an la khung lo a; Lukaku, Alexis leh Sensi tan hmingchherna hun ṭha a ni ang. Chilean forward Alexis hi league match hnuhnung berah goal a khung hnuah hnawhchhuah a ni a, hming a chher tawhna hmun Nou Camp hi a tihsual siamṭhatna hun ṭha a ni.

Alexis hian Barcelona tan hian season thum khel tawhin goal 47 a khungsak a. Spanish club hi  La Liga, Copa del Rey, FIFA Club World Cup te a champion pui tawh avangin Barcelona ṭhatna hmunah hian a tlangnel a nih pawhin a mak lo ang.

La Liga champion lai Barcelona hian Spanish football-ah ro rel mah se Champions League-a an champion hnuhnun ber erawh kum 2015 kha a nih daih tawh avangin Europe-a rorel leh turin ṭan an la thar hle.

Catalan club hian squad ṭha tih ṭhat belh nan euro maktaduai 250 chuang an seng a, an player lak thar zingah Antoine Griezmann leh Frenkie de Jong te an lansarh ang chiahin hmun pawimawh an chang nghal. Chutihrualin Barcelona-in tun dinhmun an thlen theihna chhan Lionel Messi hi hliam vangin vawi khat chauh inkhel bul a ṭan a, hetah hian hliam vang bawkin lakchhuah a ni.

Messi leh Ousmane Dembele te hian training an zawm leh tawh a, Inter nen hian inlan thei dinhmunah an ding.

Inter hi Conte hnuaiah harhtharna chang mah se Champions League-ah erawh beisei an pha lo. An group zinga nem bera ngaih Slavia Prague chu an mualah an draw hram. Barcelona an danglam lo, Catalan club hian Borussia Dortmund lakah vannei takin point khat an hlawh chhuak bawk.

Ernesto Valverde kaihhruai Barca hian player la nei ṭha reng mah se tun hma an pha lo - Champions League season hnunung pahniha AS Roma leh Liverpool laka an chak loh dan thlir chuan an ropui ngaia let leh tur chuan manager thlak an mamawh tih hiala ngaihdan neitu an tam a, Spanish manager hian hun tam a nei tawh lo tih a inhrechiang ang.