Suarez-a'n Atletico chakpui

Atletico Madrid-in Ningani zan khan Ipurua Municipal Stadium an luhchhuah a, Eibar 2-1 in an hneh. La Liga inkhel hmuhnawm takah Eibar keeper Marko Dmitrovic-a'n minute 12-naah penalty aṭangin goal hmahruai a khung a, Atletico-in Suarez goal hnih hmangin an lehthal.

Uruguayan striker Suarez hian minute 40-naah angle zim tak aṭangin siphurh sutna goal a khung a, chakna goal hi minute 89-naah penalty aṭangin a khung. Barcelona striker hlui Suarez hian penalty hi panenka kick hmangin a pet goal. Injury time-ah Eibar hian Atletico defender Stefan Savic handball vangin penalty an beisei leh a, amaherawhchu pek an ni tawh lo.

Diego Simeone hote hian an hnuai chiaha awm Real Madrid aia match khata an khel tlem chungin point sarihin an sang zawk a, champion turin an dinhmun an siam ṭha zel. La Liga inkhel dangah Valencia leh Osasuna te 1-1 in an inhnehtawk.

Real Madrid hian zanin dar 1:30 hian Deportivo Alaves a hmachhawn dawn a, point thum an hmu lo a nih chuan Zinedine Zidane-a dinhmun a derthawng lehzual ang. Real hian Copa del Rey-ah third division club Alcoyano 2-1 a hneh loin an tla.

Chutihrualin khawthlang media ṭhenkhat chuan French manager hi season tawp thlenga a cham tur thu an la ziak fan a, amaherawhchu result ṭhain a zui lo a nih chuan a chelh reng a rinawm lo zawk.

Barcelona-in Pathianni zan dar 8:45 hian Elche an hmachhawn dawn a, Ronald Koeman-a hote hi league match hnuhnung pathumah chak leh tawh mah se table-ah pathumna an la ni pha chauh a, an hmelma Real Madrid hnuaiah an awm.