Pioli enkawl Milan tan fiahna

Zanin dar 10:30 hian AC Milan chuan Serie A match khel turin Atalanta an mikhual dawn a, league hmahruaitu Milan leh an manager Stefano Pioli hi champion turin an ṭha tawk em tih fiahin an awm ang.

Atalanta hi tun dinhmunah parukna an ni mek, mahse pathumna Napoli an phak lohna chu point khat chauh a ni - an dinhmun hi a la chhe lo. Milan hi hmahruaitu ni mah se an chetsual chuan Inter Milan nen an dinhmun inthlak thei reng a la ni ve bawk.

Team phnih sulhnu pumpui thlir chuan Milan an chungnung. Amaherawhchu tun hnai league match bika an intawn hnuhnung 10 aṭang chuan Milan hi vawi khat chauh an chak, an harhna chan hi Atalanta lakah an chhawm thei em tih chu a lang dawn.

Zlatan Ibrahimovic a dam leh tawh a, Swede striker hian a match hnuhnung berah goal hnih khungin a team a chakpui leh tawh; zaninah pawh ani hi Milan hmachhuan tur a ni leh dawn - Atalanta tlarhnung tan ven ngun ngai bik a ni ang.

Covid-19 vanga buaina nei Theo Hernandez, Ante Rebic leh Rade Krunic te inkhel turin an inpeih leh tawh, hliam tuar Simon Kjaer erawh a dinhmun a la chiang lo. Player thar Mario Mandzukic pawhin training a zawm tawh avangin chhawr theih zingah a tel.

Tun season Serie A match 18 an khelh tawh chinah Milan hian vawi khat chiah chak loh an la nei, champion Juventus an ngam lo. Season duhawm an hman kum hian tun hnaia an hneh hleih theih loh Atalanta pawh hneh thei tura beisei an ni.

Italian Super Cup an lak hnuah Juventus manager Andrea Pirlo chuan league lamah pawh beisei an neih san thu a sawi. Pathianni tlaia Bologna an mikhual hunah a player inhliam ṭhenkhat chu lo kir thei tura ngaih an ni bawk.

Hrileng hnim hnaih vanga Napoli hmachhawn lo Alex Sandro leh Matthijs De Ligt ten khunghran hun chhung an hmang zo tawh. Merih Demiral leh Federico Chiesa te pawh an dinhmun a ṭha tawh a, an ṭhat dan berin an inrem thei leh tawh dawn.

Pirlo chuan, "Hmachhawp leh tih tur tam tak kan nei, chung zingah chuan league match tina hnehna chan tum a ni. Serie A hi a awlsam lo a, eng team pawh hmachhawn ni ila a ṭha thei ang bera khelh theih a pawimawh," tiin a sawi.

AS Roma    07:30 PM    Spezia

AC Milan    10:30 PM    Atalanta

Udinese    10:30 PM    Inter Milan

Fiorentina    01:15 AM    Crotone

January 24, Pathianni

Juventus    05:00 PM    Bologna

Genoa    07:30 PM    Cagliari

Hellas Verona    07:30 PM    Napoli

Lazio    10:30 PM    Sassuolo

Parma    01:15 AM    Sampdoria