Melbourne leh Adelaide a danglam lo - Thiem

Dominic Thiem chuan Australian Open khel tura player an khunghran chungchang a sawi chhuak a, Melbourne khawpui leh Adelaide lama an enkawl dan leh inkaihhruaina chu a danglam lo niin a sawi.

Tournament khel tur player nawlpui chu Melboure-ah dahkhawm an ni, player langsar ṭhenkhat erawh exhibition match khel turin Adelaide-ah dah an ni thung; player tam tak chuan induhsak biknaah ngaiin an sawisel nasa hle.

US Open champion Thiem chuan, "Adelaide lama ka awm ve thei hi ka lawm, mahse a nihna takah chuan a ṭhat bikna a awm chuang lo. Melbourne lama training kan neih theih zat nen a danglam chuang lo.

"Tunlai thil thleng bika chanchin duhawm lo zawk chu player 72 ngawt mai training thei loa an awm hi a ni. Anni tan chuan ṭha taka tournament khelh a harsa hle ang tih a chiang a, chutih rualin hri kai leh a kaihhnawih an nih avangin in chhuah zalen ngawt theih a ni si lo," a ti.

Austrian star hian player dangte harsatna a hriatthiampui a, chutihrual chiah chuan coronavirus dona kawnga Australia sorkar hmalakna leh inkaihhruaina khawng tak chu an zavaia ṭhat tlanna tur niin a sawi bawk.