Marquez-a'n hma a sawn zel

MotoGP vawi ruk champion tawh Marc Marquez chu a ban zai a nih hnuah a dam chho mek zel a, tun hnai khan inchhungah a taksa a sawizawi ṭan thei leh tawh - season thar a ṭan theih ngei a beiseiawm.

Season hmasa intlansiak hmasa berah Marquez hi a chesual, a ban dinglam ruh zai a ni. Beisei loh tak maiin hun rei vak lo hnuah a lo kir tur thu sawi a ni, mahse beisei ang erawh chuan a lo kir hma thei ta lo.

December thla khan a vawi thum nan a ban hi zai a ni a, season hmasa tluan khan a intlansiak chhunzawm thei ta lo. January 14 khan a team Repsol Honda chuan an rider enkawl chungchangah an hmanhmawh loh thu an lo sawi tawh.

Honda chuan thuchhuah siamin, "Marquez hi in lamah dimdawi taka enkawl a la ni a, a dam chian hma chuan inelna a hmachhawn lo ang. Team chuan a lo kir hun tur hi beiseina nen nghakhlel takin kan thlir reng," an ti.

Bike intlansiakna sang ber MotoGP hi March 28 aṭangin season thar an ṭan dawn, inelna hmasa ber atan Qatar Grand Prix chu zanah an tlan ang. Inelna neih hun a hnaih tawh avangin team ṭhenkhat chuan training neih dan tur an duang fel thawkhat tawh.