Aizawl FC khingpui tur Indian Arrows

Pathianni tlai dar 4:00 hian Aizawl FC-in Kalyani Stadium-ah Indian Arrows an hmachawn dawn a, point thum hmuh ngei a ṭul dawn a ni.

Tun season I League-ah hian team 11 an tel a, vawi khat ṭheuh inkhelh chhuah zawhah a sang parukin champion tur an zawng dawn. A hnuai lama awm pangain relegate tur an zawng thung ang.

Aizawl FC-in an match hmasa berah Roundglass Punjab hneh lo mah se Gokulam Kerala 2-0 a an hneh danah team ṭha an ni tih an pholang. Mizo club tan hian MC Malsawmzuala leh Lalrammawia ten goal an khung a, player kim loa an khel chungin an khel ṭha hle.

Covid-19 vanga player ṭhenkhat an quarantine rei avang leh coach Lalsangzuala Hmar-in hripui hi a kai avangin Mizo club hian harsatna an tawk. Match hmasa bera Punjab nen an inkhelh ṭum hian an rilru an la inpeih lo a, tunah erawh rilru lamah ngai an awh tawhah a ngaih theih.

Chutihrualin coach thar Yan Law erawh quarantine hun a hman ṭan chauh avangin Indian Arrows nen a la inlan thei dawn lo a, January 30-a AFC coach hlui Gift Raikhan-a enkawl Neroca an hmachhawn hunah erawh team a ho theih beisei a ni.

AFC khingpui tur Indian Arrows-ah hian India rama rawlthar ṭha rual dah khawm a ni a, amaherawhchu foreigner an lak theih loh bakah senior player an kawl loh avangin tun ṭumah hian team nem ber an la ni rih.

Arrows hian match thum an khelh tawhah la chak lo vekin goal 12 an chhuah a, goal hnih chiah an la khung. Mizo club tan Indian Arrows hi dinhmun siamṭhatna hun ṭha a ni dawn a, point thum bakah goal khung tam a pawimawh dawn a ni.

Trau    02:00 PM    Chennai City

Aizawl FC    04:00 PM    Indian Arrows

Roundglass Punjab    07:00 PM    Mohammedan SC

January 25, Thawhṭanni

Churchill Brothers    02:00 PM    Sudeva Delhi

Neroca    07:00 PM    Gokulam Kerala