Team ṭha an khel dawn - Arteta

FA Cup fourth round-ah champion lai Arsenal-in zanin dar 5:45 hian Southampton an hmachhawn dawn a, Mikael Arteta tan chuan team ṭha a khelhtir tur thu a sawi.

Gunners-in season liam ta khan Spanish manager Arteta hoin FA Cup semifinal-ah Manchester City an hneh a, final-ah Chelsea an hneh zui. London club-in season ṭanna inkhelah Liverpool hnehin Community Shield an chawi a, an phur thar hle.

Amaherawhchu Premier Leasgue-ah an chet ṭhat loh avangin Arteta chhuak tura duhtu an pung a, relegate hial an hlau hman. Tunah erawh Gunners hi an insiamṭha leh tawh a, Premier League match hnuhnung pangaah hneh loh tawng loin vawi li an chak.

Pierre-Emerick Aubameyang-a'n a goal khungna 'boot' a bun leh tawh a, Bukayo Saka pawhin match tinah a thiam thil a lantir zel theih avangin a theihnaah rinhlelh tur a awm ta lo. Gunners hi Premier League club Saints khelmual St. Mary's Stadium-a lenglut tur an ni chungin tun hnaia an khelh dan thlirin chak tura rin zawk an ni ang.

Arsenal boss Mikael Arteta chuan, "Ni thum chhungin Saints hi vawi hnih kan hmachhawn dawn a, a mak ang reng khawp mai. FA Cup-ah chak zel kan duh a, team ṭha kan khelhtir ang," tiin a sawi. Thawhlehni zan dar 1:45 hian Gunners leh Saints te hi St Marys' Stadium-ah bawk Premier League match an khel lehnghal ang.