Liverpool-in pul hri an vei!

Jurgen Klopp-a'n Burnley an hmachhawn hmain a team khelh dana a lungngaih loh thu sawi mah se German coach tan mangan lohna chi a ni tawh lo - Ningani zan khan relegate hlauthawnawma ding Burnley chu 1-0 in an ngam lo a, Ashley Barnes chuan inkhela goal awmchhun hi penalty hmangin a khung. 

Burnley nena an inkhel a zawh meuh chuan Klopp-a thusawi pawh a dang zui a, German coach chuan, "Hmaia hnek chawrh ang mai a ni," tiin an chak loh chu an tan a nat thu a sawi. 

Liverpool hian Premier League hmahruaitu Manchester United chu point ruk ngawtin an thlau ta a, Reds legend Jamie Carragher chuan, "Nomawi ai chuan top four-a awm loh chu an hlauhthawn tur zawk a ni ang," tiin a club hlui a dim lo a, hei hian Liverpool dinhmun a sawifiah.

Liverpool khelmual Anfield-a lenluh hi eng team mahin an chak lo a, a bik takin Burnley ang team tan chuan chak beiseina chi a ni lo. Mahse, Premier League club tenau hian football mawina an pho chhuak a, April 2017 hnua Anfield-a league match-a la tlawm ngai lo Reds chu 1-0 in an hneh. 

Anfield-a goal awmchhun hi penalty aṭanga lut a ni a, Liverpool keeper ṭha mi Alisson chuan Barnes a tih tluk avangin penalty hi a chawi - kum 31 mi Barnes-a'n goal-a chantir turin harsatna a nei lo. 

Burnley-in goal an khung hian minute 83-na a ni tawh a, tun hnaia beisei phak lo Liverpool an 'comeback' thei tawh lo - minute 440 chhung chu Premier League-ah goal an khung tawh lo a, kum 2021 league match-ah chak an la nei miah lo bawk. 

Reds ṭantuten chhuanlam an zawng duh a nih chuan chhuanlam tur a awm - tun season-a a vawi khat nana bul ṭantir Divock Origi chuan keeper chauh a hmachhawn chungin bar a tih per thei hram a, Burnley laka a khelh dan avang hian Kop tam tak chuan Champions League 2019 nomawi an chawi theih nana a tha thawh kha an theihnghilh tawh hial ang!

Jurgen Klopp-a'n rin loh takin bench-ah Mohamed Salah leh Roberto Firmino a dah a, player pahnih hi minute 57-naah luhtir an ni. Mahse, player pahnih hian an goal khungna pheikhawk in lamah an hnutchhiah emaw tih mai tur a ni a, goal an khung thei bik lo. 

Salah leh Firmino-te hian goal khung theihna remchang zet an nei a, mahse, player pahnih hun ṭha neih chu Burnley keeper Nick Pope fakna a chang a, a dang ṭha dun hle. 

Anfield-ah mualneitu team-in 72% zet ball an chang a, mahse, Premier League champion hi an ball chan zat aṭanga teh chi an ni lo. An che a muang a, an khel a hmuhnawm lo a, gegenpressing hmingthanpuitu club kha an ni ta lo em ni aw, tih mai tur a ni. 

Liverpool player hmelah inrintawkna hmuh tur a awm lo a, Jurgen Klopp-a'n, "Mahni inrintawkna hi pangpar te takte ang a ni a, tu emaw chuan chu parmawi tak chu an rap fuh a ni," tiin a player-ten inrintawkna an hloh thu a pha lo. 

Reds hian league match 19 aṭangin point 34 an nei tawh a, season hmasa nen khaikhin chi a ni lo - season hmasa khan league match 19-ah chuan point 55 an nei a, table chung berah point 13-in an sang fal!

Liverpool hian December 19 khan 7-0 ngawtin Crystal Palace an sawp a, Liverpool fan-ten season hmasaa an 'form' an nei let leh taa an inngaih laiin Premier League-ah an chak zui ta miah lo!

Klopp chuan, "Sawifiah harsa tak a ni. Ka naute hi 7-0 a chak avang maia phur hlut chi an ni lo a, an theihtawp an chhuah a, mahse, kan duh angin thil a thleng miau si lo. 

"Kan beisei anga thil a kal loh chuan a hma aia nasaa beih a ngai a ni mai. Burnley lakah tlawmin kan match hnuhnung paliah goal kan khung lo a, chuti chung chuan nomawi chungchang lo sawi ta ila, thil attthlak tak a ni ang," tiin nomawi pawh a sawi duh rih lo. 

*May 2000 hnua a vawi khat nan Liverpool-in league match li chhung chu goal an khung tawh lo a, West Brom nen 1-1 a an inhnehtawk ṭuma Sadio Mane-a'n goal a khung hnu khan vawi 87 shot an nei!

*Jurgen Klopp enkawlna hnuaia team pakhatin league-a goal an khung loh rei ber record chu Liverpool hian an nihrual a, November - December, 2006 khan Klopp-a enkawlna hnuaiah Bundesliga club Mainz chuan league match li chhung chu goal an lo khung lo tawh. 

*Klopp-a hnuaia a vawi hnih nan Reds hian Premier League match nga chu a zawnin hnehna an chang zo tawh lo a, January - February, 2017 khan Klopp-a hnuaiah tho league match nga chu an lo chak zo tawh lo. 

*Liverpool-in Burnley lakah vawi 27 zet shot nei chungin goal an khung lo a,  April 2013-a Reading laka shot 28 nei chunga goal an khung loh hnuah Premier League match khata shot 27 nei kai chunga goal an khung lohna hmasa ber a ni - Anfield bikah chuan April 2012 khan West Brom lakah vawi 30 shot neiin goal an khung lo. 

*Ashley Barnes-a goal kha Premier League-a khualmuala match 11 zet hnua goal a khung lehna hmasa ber a ni a, November 2019-a Watford laka a khung hnuah khualmualah goal a khung ve leh ta. 

*Burnley keeper Nick Pope hian season hmasa ṭantir aṭanga chhiarin Liverpool lakah save 19 zet a nei a, hetih chhung hian ani aia team pakhat laka save ngah keeper an awm lo - Anfield-a a game hnuhnung pahnihah vawi 14 goal dan a nei a, Ningani zan bikah hian vawi ruk ngawt save a nei.