Chennaiyin lakah Bagan an vannei

ATK Mohun Bagan-in Chennaiyin FC laka hnehna chang turin vanneihna an mamawh tel a, Ningani zan khan ISL club talbuai mek hi hun pek belha David Williams goal hmangin 1-0 in an hneh hram.

 

Team pahnih hi goal khung loin an ṭin mai dawn niin a lang hman a, mahse, hun pek belh minute linaah bench aṭanga luhtir David Williams-a inlar a, Australian striker hian a thiam a la theihnghilh lo tih pholangin a team chakna goal a khung. 

A League club Wellington Phoenix striker-in goal a khung hian hun pek belh minute khatna a ni tawh a, Chennaiyin tan tho leh turin hun a tam tawk tawh lo - a tawpah 1-0 in Bagan an chak a, league round hmahruaitu nia season thara AFC Champions League khel turin an dinhmun a ṭhat belh zel. 

Hetihlai hian Chennaiyin tan erawh playoff khelh beiseina a thamral mek zel a, South Indian club hian league match 13 an khelhah vawi thum chiah hnehna an la chan avangin semifinal khel tur chuan chak ṭan a hun tawh!

ATK Mohun Bagan-in Mizo player kawl an nei lo a, Chennaiyin lamah Jerry Lalrinzuala leh Lallianzuala Chhangte ten inkhel bul an ṭan thung - season ṭantir lama Chennai club player pawimawh Lalchhuanmawia Fanai hmel hmuh tur a awm leh bawk ta. 

Lengpui tlangval Chhuantea hi hliam vangin rei tak chhung a inlan thei lo a, Bagan lakah bench-ah bul a ṭan - Jerry chu minute 80-naah a thlak a, danglamna erawh a la thlen thei bik lo.