FC Goa tan Champions League a hnai

Zanin dar 7:30 hian Jamshedpur FC chuan FC Goa an mikhual dawn a, an league match hnuhnung ber khel tur Goan club hian point khat an hlawh chhuak a nih chuan table chung ber luah chungin league round an khar ang. 

Season thar aṭangin Indian club-ten AFC Champions League chu group stage aṭangin an khel ve thei tawh dawn a, he hmun ruak hi All India Football Federation chuan India rama league sang ber nihna a pek ISL tan dah a ni. 

ISL-ah final hmangin champion tur zawn ni ṭhin mah se AFC kalphung zui tel a ngaih avangin league-a point hmu hnem ber chuan Champions League hi an khel dawn a ni - Goa tan bung thar kaina hun a inhawng. 

FC Goa hnuai chiahah hian ATK an awm a, mahse Goan club hian Isaac Vanmalsawma khelhna Jamshedpur lakah point an hlawh chhuak a nih chuan ATK tan a chung bera season khar beiseina a bo ang.