Team talbuai Liverpool hmaah team 'nung' United!

Season ṭantira inhmachhawn tur kha ni se Manchester United aiin Liverpool chu rin hlawh tur zawk an ni a, mahse, tunah erawh thawnthu a danglam tawh. 

Pathianni zan dar 10:30-ah FA Cup fourth round khel turin Manchester United chuan Liverpool an mikhual dawn a, Jurgen Klopp-a naute tan hmabak hautak a tling. 

Red Devils hi Premier League hmahruaitu ni mek an ni a, Liverpool nen khelh zat inangah point rukin an sang zawk - zaninah chuan rin hlawh lo zawk nichungin Liverpool-in Old Trafford an lenglut ang. 

Burnley laka Klopp-a player thlan dan enin German coach hian United nena an inkhel tur a thlir lawk tih a hriat a, player langsar zingah hliam tenau nei Jordan Henderson, Mohamed Salah leh Roberto Firmino-te bench-ah a dah.

Pathianni zanah erawh Klopp hian player ṭha 'khek' a tum lo ang tih a chiang a, England-a pan hnuah Champions League leh Premier League nomawi chawi tawh mah se a la chawi loh nomawi langsar zingah FA Cup a tel. 

Hei vang tak hian Klopp-a'n FA nomawi chawi a duh dawn a, a kalkawnga United hneh bawk aia duhthlan tur hi a vang ang - inkhel hmuhnawm beisei rawh. 

Klopp-a'n Old Trafford-ah awlsam takin a chak theih loh tih a hrechiang ang - January 17 khan Anfield-ah league match khelin United hi an lo mikhual tawh a, 0-0 in inkhel a tawp. 

Liverpool-in ball chang tam zawk mah se Anfield-a inkhel ente chuan United an hlauhawm zawk tih an hmu ang tih a chiang a, Klopp tan fimkhur a finthlak dawn tih hi Luka ziak tluka pawmawm a ni. 

United hi league match 13 chhung chu a zawnin an tlawm tawh lo a, FA Cup-a nih tak avanga tlawm thut an tum dawn lo - an hmelma Liverpool hi Old Trafford-a hnehna hlado chham tir an duh dawn lo. 

Liverpool hian FA Cup-a United an hmachhawn zawhah league match khel turin Tottenham Hotspur chu an lenchilh dawn a, West Ham, Brighton, Manchester City, Leicester City leh Everton-ten an lo hmuak bawk ang!

Reds fixture-in a hrilhfiah chu Liverpool player-ten an inrintawkna nei let turin United an hneh a ngai tih hi a ni a, Red Devils hi an hneh a nih ngat chuan season hmasaa kan hmuh Liverpool kha kan hmuh chhunzawm leh thei hialin a rinawm. 

Klopp chuan, "Ka naute hian goal khung turin theihna chu an nei ngei a, mahse, rei tak goal an khung tawh loh avangin inrintawkna an tlachham ta tih chu a hmuh theih a ni," tiin a sawi a, an inrintawkna neih let nan goal khung an mamawh.