Bayern leh Gnabry lakah Spurs tlu sawp

Tottenham Hotspurs buaina chhunzawmna chu mualphona a ni a, English club hian Thawlehni zan khan an mual Tottenham Hotspur Stadium-ah Bayern Munich 7-2 in an hneh lo. German club tan Serge Gnabry-a'n goal li a khung a, Arsenal forward hlui hian twitter-ah 'North London a sen' tiin a ziak zui bawk.

UEFA Champions League group B-ah Bayern-in point ruk hmuin hmahruaitu an ni a, Red Star Belgrade-in Olympiakos hnehin point thum hmuin pahnihnaah an awm. Spurs leh Greek club Olympiakos ten point khat ve ve chauh an la hmu a, Mauricio Pochettino meuh pawh a hmalam a chiang ta lo.

Spurs-in chak tumin bul an ṭan a, Son Heung-min-a'n goal hmahruai a khung. Amaherawhchu, Bayern-in Joshua Kimmich hmangin an sut vat. Hemi hnu pawh hian team pahnih an intluk tawk a, first half-a German champion danglamna erawh Robert Lewandowski an kawl - Polish striker hian 'cial' takin a khung.

Second half-ah Bayern-in goal nga an khung belh a, Lewandowski-a'n goal khat dang a khung belh bakah Gnabry-a'n goal li zet a khung. Spurs-in Harry Kane hmangin siphurh sut ṭhen mah se mualphona a hliah khuh lo. Chutihrualin Bayern leh Spurs te hi an inchai tawk viau a, German club goal hmaa an hriam zawkna chu team pahnih danglamna a ni.

Kum 137-a upa Tottenham-in an muala goal sarih an chhuah vawi khatna a ni a, Spurs bawk hian 1995 Intertoto Cup-ah FC Cologne 8-0 in an hneh lo. Hemi hnua English club zinga Europe inelnaa goal sarih chhuah leh hmasa ber an ni.

Tottenham ṭantu hliamah goal li khungtu Gnabry-a'n chi an phul zui. Germany international hi Arsenal tana khel tawh a nih avangin North London inhal zia a hrechiang a, Spurs tih el nan twitter-ah 'North London a sen' tih ziak khauhin a club hlui Arsenal ṭantute lawm a siam.

Kum 24 mi Gnabry hian kum 17 mi lek a nihin Arsenal a zawm a, Arsene Wenger-a'n beiseina sang tak nei mah se hliam vangin a buai. August 2015 khan loan hmangin West Brom-ah kalin manager Tony Pulis-a'n khel tlakah a ngai lo.

Heti chung hian Wenger-a'n contract zawrh mah se Gnabry hian khelhna hmun chan tam inbeisei loin August 2016-ah Werder Bremeh a zawm. Bayern Munich-in a ṭhatna hmu fuhin an lalut a, Hoffenheim-ah loan hmanga an inchher hriam hnuah an lalet a, season liam ta khan Bayern player of the year a ni tawh a ni.

Spurs manager Mauricio Pochettino chuan, "Ṭawng a harsa. Dressing room-ah pawh engmah ka sawi lo. Kan ṭanrual a pawimawh a, kan inpumkhat lehzual a ngai. Chutihrualin tun dinhmunah chuan thu sawina hun a ni lo. Boruak daih hunah kan ṭawng chhuak ang," tiin an thil tawn vanga hrehawm an tih thu a sawi.

Goal sarih an chhuahna kawnga mawhphurtu zinga mi Jan Vertonghen chuan, "Hrehawm ka ti taket a, ka zak a, thil ṭha lo lam hlir min ngaihtuah tir a ni," tiin a sawi. Spurs hian league match sarihah point 11 an hmu a, point ruk an hmu mek. October 5, Inrinni zan hian Premier League-ah Brighton & Hove an hmachhawn dawn a, mangchhia aṭanga ṭhanharhna hun ṭha a ni thei ang.

12' - SON    Spurs midfielder Moussa Sissoko ball pek chu Son Heung-min-a'n fing taka um lutin goal kilah a pet.

15' - KIMMICH    Box pawn aṭangin Joshua Kimmich-a'n petna tur khawp insiamin ding lam kilah a pet lut.

45' - LEWANDOWSKI    Robert Lewandowski-a'n box chhungah ball per chang fuhin rang taka vir puin mawi zetin a pet lut.

53' - GNABRY    Serge Gnabry-a'n mual vei lamah chak takin a khalh lut a, angle zau zawnga khalh lutin kawh zetin a pet lut.

55' - GNABRY    Corentin Tolisso ball pek chu a ke vei lamin goal kilah lei hrulin a pet lut. 

61' - KANE    Danny Rose-a'n Kingsley Coman laka a penalty hlawhchhuah chu Harry Kane-a'n si phurh sut ṭhen nan a hmang.

83' - GNABRY    Thiago Alcantara through ball chu Serge Gnabry-a'n um lutin 'cool' takin a khung.

87' - LEWANDOWSKI    Spurs box pawn chiahah Philippe Coutinho-a'n a ball hmuh chu vawi khatah Robert Lewandowski a pe nghal a, Polish striker hian vawi khatah tho pet nghalin goal kilah tak a dah.

88' - GNABRY    Serge Gnabry-a'n inrintawkna a ngah tawh a, box pawn aṭangin goal kilah kawh zetin a pet lut. Bayern goal sarihna a ni chiah bawk.

Tottenham    2 - 7    Bayern Munich

TOT : Son Heung-min 12'; Harry Kane 61' (P)

BAY : Joshua Kimmich 15'; Robert Lewandowski 45', 87'; 

   Serge Gnabry 53', 55', 83', 88'

Red Star Belgrade    3 - 1    Olympiakos

RED : Milos Vulic 62'; Nemanja Milunovic 87'; 

   Richmond Boakye 90'

OLY : Ruben Semedo 37'