MPL hun a inher chhuak Chhinga Veng Vs Chanmari

Santosh Trophy qualifying round khelh vanga Mizoram Premier League Season 8 chawlh a nih hnuah vawiin tlai aṭangin Lammualah khelh ṭan a ni leh dawn.

Tlai dar 4:00-ah Chhinga Veng leh Chanmari an inhmachhawn dawn a, tualchhung football ngainatute tan  en châkawm a ni. Chhinga Veng coach Anand Gurung chuan, "Mizoram team aṭanga kan zin haw hnua kan team training ka hmuh hmasak ber chuan min tilawm hle. An fit ṭha a, inkhel turin an inpeih. Result sawi lawk theih ni lo mah se Chanmari hmachhawn hun hi kan nghakhlel," tiin Vanglaini a hrilh - Anand Gurung hi Mizoram team coaching 

staff-ah a tel.

Chhingcows hian MPL match hnih an khelh tawhah chak an la neih loh ang chiahin chak loh pawh an nei lo. MPL6 champion hian Aizawl FC (2-2) leh FC Venghnuai (1-1) lakah point khat ve ve an hlawh chhuak a, MPL kaithar an hmachhawn ṭum hian foreign striker Quattara Sie-a'n goal a khung.

Chhinga Veng hi Quattara ringawta innghat an ni lo a, team thawhhonaa innghat an ni; Anand chuan sawi chhunzawmin, "Kan player-te hi an lian lo a, an che rang thung," tiin game rang tak nen attacking football khelh an tum thu a sawi.

Chhingcows attacking player Lalsawmzela, C. Lalchungnunga, Ṭhasiama leh KC Larchhuakmawia te chevel hi hmuhnawm a tling. Chutihrualin tun season-ah chuan Chanmari hi squad nei chhah zawk an ni a, coach S. Malsawmtluanga hoin nomawi chawi ngei an tum.

Mama ho hian Chanmari hian Ramhlun North an hneh a, amaherawhchu Mizoram Police an hneh loh avangin chak lo zawn thei dinhmunah an ding. Chanmari coach Mama chuan, "Tawnhriat nei ṭha zawk ten inhliam tenau an neih avangin kan veng (Chhinga Veng) kan khelh hunah player naupang zawk kan hman a ṭul dawn," tiin Vanglaini a hrilh.

Chanmari hian MS Dawngliana leh H. Lalmuankima te bul an ṭantir dawn lo a nih a rinawm a, engtin nge team a nghawng dawn tih chu vawiin tlai hian a hriat ang.