March 6 hian Aizawlah Professional Boxing Fight

Nimin khan Mizoram sports minister Robert Romawia Royte-in a pisaah thutharthehdarhtute a kawm a, March 6 hian India hmarchhaka a vawi khat nan WBC hnuaia Professional Boxing Fight hmasa ber chu Aizawla a neih a nih tur thu a puang.

Professional Boxing Fight hmasa ber hi ruahman dan chuan R. Dengṭhuama Hall, Mualpuiah neih tum a ni a, 'LPS Fight Night' tih a ni ang. LPS Vision neitu Lalsawmliana Pachuau chuan Mizote ngaihhlut LPS Pro Fight a awm tawh loh tur thu a sawi a, 'LPS Fight Night' chu Mizote tana rahbi thar a nih tur thu a sawi.

LPS Fight Night 'Professional Boxing' hi LPS leh Grassroot Boxing Promotion and Management te ṭangkawpin an buatsaih dawn. Fight Night hmasa berah hian main event-ah Mizo zinga professional boxer hmasa ber Lalrinsanga Tlau leh Ghanaian boxer Eric Quarm ten Super Feather Weight-ah World Youth Title an inchuh dawn.

Kum 23 mi Quarm hian vawi nga fight a neih tawhah vawi li a chak a, a khingpui vawi khat a knockout. World Youth Title hi kum 23 chin tan a ni a, champion lai  Kazakhstan mi Sultan Zaurbek chu kum 24 mi a nih tawh avangin a champion belt hi a kalsan a ni.

Khawruhlian tlangval Sangtea hian vawi li a inhnehtawk a, record-a awm chin erawh a vawi thum niin hnehna a la chang vek. Kum 21 mi Sangtea hian Digari Mahesh chu September 22, 2019 khan Delhi-ah a hneh a, hemi hnu hian G Mallikharjuna (TKO) leh Haidari Mchanjo (UD) te chu a hneh leh tawh a ni.

Title fight bakah hian fight dang panga a awm dawn. Co Main event-ah Indian boxer Asad Asif Khan leh Afghanistan boxer Nawid Mohammadi te an inhnek ang a, anni hi featherweight (57.2 kg) category an ni.

Under Card-ah Mizo boxer pali an inlan dawn. Superwelterweight (69.9 Kg)-ah Mualpui tlangval C. Lalhruaitluanga'n Congo boxer Joseph Emmangindu a hmachhawn dawn. Khuangthing tlangval Vanlalawmpuia'n Super Lightweight (63.5 kg)-ah Rakesh nen an inhnek ang.

Cherhlun tlangval F. Zoramchhana'n Super Bantamweight (55.3 kg)-ah Mazhar Hussain a hmachhawn ang a, Welterweight (66.7 Kg) ah Republic Veng tlangval Zochhuanawma Fanai leh Rohit Choudhary te an inhnek bawk dawn a ni.

Fight Night hi khawvel hmun hrang hrang aṭanga en theih turin ruahmanna siam a ni dawn. LPS Vision neitu Lalsawmliana Pachuau chuan, "Fight Night atan hian cheng nuai 20 vel sen a ni dawn a, LPS tum tur a ni. Fight en man tur hi tih chian a la ni lo a, kan senso phuhruk theih dan tur ngaihtuah chungin a tlawm thei ang bera pekchhuah kan tum ang," tiin a sawi.

LPS pawt tan chuan PPV channel bik siam a ni dawn a, LPS pawt lo tan pawh LPS Apps kaltlangin a en theih dawn a, pawisa chawi erawh a ngai ang.

Mizo boxing-a hming hriat hlawh tak NT Lalbiakkima chu Mizorama professional fight hmasa berah hian a tel dawn lo. Siaha tlangval NT-a hian December 20, 2020 khan Mumbai-a fight hmasa berah Aman chu technical knockout hmangin a hneh.

Amaherawhchu NT-a hi Marine Pro Boxing Promotions hnuaiah a awm a, Mizorama inelna buaipui turte hi Grassroot Boxing Promotion and Management an nih avangin a tel thei dawn lo. Lalsawmliana Pachuau chuan, "Main event tur kan nei tawh a, a danga a awm a rem lo. Inlan hun a nei ngei ang," tiin a sawi.

Mizoram sports minister Robert Romawia Royte chuan, "Sorkarin kan tih turte a awm a nih chuan kan ti ve ang. Mizote hian boxing-ah thui tak kan thleng thei ang tih hi ka ring tlat. MGM Grand Las Vegas-ah hian Mizo pa hi a la inhnek ve ang tih hi ka beiseina a ni a, tun hi a bul ṭanna tur a ni," tiin Mizoten boxing-ah thui tak an thlen theih a beisei thu a sawi.

January 30 hian Mumbai Infinity Mall-ah Lalrinsanga Tlâu leh Vanlalawmpuia te an inhnek dawn a, Mizoram Sports Minister hian a telpui ang. Vawi thum chak tawh Sangtea hian Prince Shriwastava, Maharashtra a hmachhawn dawn a, Khuangthing tlangval AwP-a hian professional fight hmasa berah Ashish Sharma, Uttar Pradesh a hmachhawn ang.

Mumbai lama an zin ṭumah hian Mizo tlangvalte hi Sibyfarms-in an sponsor dawn a ni.

March 6, 2021 - R Dengthuama Hall, Mualpui, Aizawl

MAIN-EVENT - Round 8 : super featherweight (kg 59)

Lalrinsanga Tlau (Khawruhlian) v Eric Quarm (Ghana)

- WBC World Youth Title Championship

CO-MAIN-EVENT - Round 6 : featherweight (kg 57.2)

Asad Asif Khan (India) v Nawid Mohammadi (Afghanistan)

Joseph Emmangidu (Congo) v C. Lalhruaitluanga (Mualpui)

- Super featherweight (kg 69.9) - Round 6 

Rakesh (India) v Vanlalawmpuia (Khuangthing)

- Super lighweight (kg 63.5) - Round 6

Mazhar Hussain (India) v F Zoramchhana (Cherhlun)

- Super bantamweight (kg 55.3) - Round 6

Rohit Choudhary (India) v Zochhuanawma Fanai (Republic Veng)

- Welterweight (kg 66.7) - Round 4