City tan Dinamo an nau

Premier League champion Manchester City-in Champions League match hnih an khelh aṭangin point ruk an nei ta a, Thawhlehni zan khan an mikhual Dinamo Zagreb chu 2-0 in an hneh. 

Man City tan Raheem Sterling leh Phil Foden te chuan goal khat ve ve an khung a, Croatian club-in a chhanletna tur goal an neih loh avangin an tlawm. Inhliam Kevin de Bruyne tel loa khel City-in inkhel ṭantir aṭangin goal khungna chance vawi tam an nei a, 2-0 aia tam zawka chak an phu. 

Mahse, Sergio Aguero, Bernardo Silva, Ilkay Gundogan leh David Silva ten hun ṭha an khawhral vek a, Aguero goal khung lah Bernardo handball vangin pawm a ni lo. Second half-ah Dinamo rawn zia hret mah se Bernardo thlaka tlan lut Sterling-a'n inkhel a rawn thlak danglam a, minute 66-naah an goal hmasa ber a khung. 

Hun pek belh minute nganaah Foden chuan goal khat a rawn thawh ve leh a, Dinamo tan goal khung vena hun a awm tawh lo. City boss Pep Guardiola chuan, "Foden-a finishing a ṭha a, tlarhma a pui hle bawk. Minute tam zawk khelh a phu a, a phu ang tawka tam ka khelhtir theih loh avangin pawi ka ti takzet a ni," a ti!

City-in result duhawm an neih piahlamah coach Pep chuan fan-te tana thu hriat nuam a sawi a, a player inhliam De Bruyne a lo kir thuai tur thu a sawi. Guardiola hi mual sir lamah a lo chet mawi loh deuh avangin yellow card pek a ni a, Spanish manager chuan, "Engmah sawi tur ka nei lo," tiin a yellow card hmuh chungchanga zawhna a chhang. 

Group C inkhel dangah Shakhtar Donetsk chuan 2-1 in Atalanta an hneh a, Italian club-in Champions League an khelh hmasak berah result ṭha an la nei thei lo. Atalanta tan hian Duvan Zapata chuan minute 28-naah goal hmahruai a khung a, mahse Ukraine club hian Junior Moraes leh Manor Solomon hmangin an chhanglet a, an chak.