Zanin dar 7-ah Chawnpui Vs Electric Veng

Mizoram Premier League Season 8-ah I Day Football champion Electric Vengin chak an la nei lo a, zanin dar 7:00-ah hian point la hmu lo Chawnpui FC an hmachhawn dawn. 

Chawnpui FC manager K. Zohmangaiha chuan, "CRS vanga kan buaina chu chinfel a ni tawh a, kan player chhawr theih tur chin chu a chiang tawh. Mawitea pawh kan chhawr thei tawh ang," tiin Vanglaini a hrilh.

MPL hmasa bera Dinthar FC an champion ṭuma player pawimawh Lalnunmawia hi I Day Football-ah inlan mah se MPL-ah CRS hman a nih avangin match hnih an khelh tawhah a inlan lo. Chawnpui hian Lalthanmawia Renthei (Amawia) an chhawr theih loh avangin goal khung tur player an melh a, Royal Wahingdoh leh Rangdajied United FC tana khel tawh, Aizawl FC striker hlui  T. Lalnunpuia (Bawihpuia) an lalut.

Khawzawl tlangval Bawihpuia hi free man a nih avangin CRS hmangin ziahluh theih a la ni a, chutih rualin Electric Veng nen hian fitness ṭha tawk lo leh document chinfel tur a la awm avangin a inlan a rinawm loh. Electric Veng pawh an buaina ber Santosh Trophy qualifying khelh zawh a ni tawh a, player kima training an neih tawh avangin an ṭhat theih ang bera inlan theih tawh tura ngaih an ni.

Lalsangzuala Hmar hote hi FC Venghnuai leh Aizawl FC nen an inhnethawk tawh a, I League club an hmachhawn ṭum hian an goal nawr a na tawk lo. Fans nei ṭha Electric Veng hian Chawnpui lakah point thum hlawhchhuah ngei an duh dawn a, inkhelh ṭan phat aṭangin attacking football an khel nghal ngei ang.