Juve-in Inter title hlihsak an duh

Italian champion Juventus chuan match fixing avanga Serie A 2005-06 title hlihsak an nih, Inter Milan hnena pek tak chu hlip turin thuneitu sang zawk hnenah an thlen. 

Serie A 2005-06 season-ah hian Juve hian table chung ber an luah a, an champion. Mahse, 'Calciopoli' tia hriat lar match-fixing buaina avanga Italian club panga hrem an nih khan Juve title hi hlihsak an ni. AC Milan chu 2005-06 season-ah hian pahnihna an ni a, mahse he buainaah hian hrem an nih ve tho avangin pathumna Inter Milan chu champion-ah puan an ni zui. 

Juve leh AC Milan bakah hian Fiorentina, Lazio leh Reggina chu hrem an ni a, Juve hi table mawngphahah awmtir niin Serie B an khel a, AC Milan hi point 30 paih sak an ni bawk. Italian football buaina lar takah hian club hremte hian match ṭhenkhatah an referee duh zawng an lo thlang ṭhin nia sawi a awm a, Italian football thuneitute chuan chhuichiangin hremna an pe zui hlawm ta a ni. 

Juve hi Italy infiamna khawvela thuneitu sang Collegio di Garanzia dello Sport tribunal-ah an zualko a, eng ang thutlukna nge an siam dawn a la chiang lo. Pathianni zan dar 12:15-ah Inter Milan chuan Juve hi league match-ah an mikhual dawn a, tun hnai thil thleng hian inkhel boruak a ti 'hot' lehzual ang.