Hmeichhe record siamtu Healy

Australia opener Alyssa Healy chuan hmeichhe Twenty20 international-a run siam hnem ber record thar a siam a, Sri Lanka laka hnehna an chan ṭumin ball 61-ah run 148-a  vaw chhuak - a tawp thleng a dam bawk. 

Kum 29 mi wicketkeeper hian Australia tana a khelhpui Meg Lanning record lo siam tawh chu a khum a, Lanning hian July khan England lakah thi loin run 133 siamin record a lo siam tawh a ni. Healy hian a ṭhiannu record khum tur hian four 19 ngawt a vaw chhuak a, six vawi sarih vuain century hi ball 46 lek a hmachhawnah a siam fel der. 

Sydney khawpuia inkhelah hian Australia hian Healy chet ṭhat zarzoin over 20-ah run 226 an siam a, wicket hnih chiah an hloh. Sri Lanka-in umphak tum viau mah se over 20-ah run 94 bak tlin loin wicket sarih an hloh a, run 132-in a tlawm zawkah an ṭang ta a ni.