Manchester United inlan hun a thleng

Zanin dar 10:25 hian Manchester United chuan Europa League group match khel turin AZ Alkmaar an tlawh dawn a, manager Ole Gunnar Solskjaer-a'n an match hmasa ang bawkin player naupang rual a khelhtir leh ngei a rinawm.

Arsenal pawh dar 12:30-ah an inlan dawn, North London club hian Emirates Stadium-ah Standard Liege an mikhual ang. Man United leh Gunners hi Thawhṭanni zan khan Premier League-ah an intawng a, Pathianni zan hian league match khelh zui leh nghal an ngaih dawn avangin player an insiksawi hle ang.

AZ Alkmaar khelmual AFAS Stadium chu kumin August thla khan thlipuiin a nuai a, a chung leh ṭhutna ṭhenkhat a ti chhia. Tunah siamṭhat hna thawh mek a ni a, tun dinhmunah chuan an mualah hian mikhual an thleng thei rih lo. An khelmual aṭanga mel 50 vela hla ami Cars Jeans Stadium-ah United nen hian an inkhel dawn.

Man United hian an match hmasa zawkah Astana chu 1-0 in an hneh hram tawh a, zanin an inkhelhna tur hi phul lem (artificial grass) a ni dawn. Group L-a an awmpui pakhat Astana Arena pawh phul lem phah tho a ni. United player tam tak chuan inkhelh harsa an ti dawn a, chetsual theihna hmun a ni.

Tlarhma lama buaina nei United-in Anthony Martial an la chhawr thei dawn lo a, Luke Shaw (malpui), Aaron Wan-Bissaka (damlo), Diogo Dalot leh Angel Gomes te chu an dinhmun a la chiang lo bawk. 

AZ Alkmaar hi group match hmasa zawkah Partizan nen an inhnehtawk, knock out stage lut tur chuan United laka point khat chauh hmuh theih pawh a pawimawh ang. Tun hnaiah AZ hi an khel ṭha tluang viau, Eredivisie lamah match riat khelh tawhah vawi ruk an chak thei a, table-ah pathumna an ni mek - United tana zuam sual theih tur chi an ni.

Player lamah erawh chhuan tur an nei teh viau lo. Aston Villa tana 2012-15 chhunga lo khel tawh defender Ron Vlaar leh Jordie Clasie te chu an hmachhuan tur an ni ang. Midfielder Clasie hi Southampton tan a khel tawh thung a, 2014 World Cup-a Netherlands pathumna an nih ṭum khan ram aiawhin a feh chhuak.

Season hmasa khan Arsenal hi Premier League match ruk khelh hmabak an la neih khan palina chin ni turin an dinhmun a ṭha hman hle. An elpui club dang an la inhmachhawn vek dawn laiin anni chuan club lian khelh tur an nei lo, mahse palina an ni phak chuang lo.

Europa League lama cheṭha ṭhin Unai Emery an neih avangin Champions League khelh theih an la inbeisei cheu. Mahse, Europa League final-ah Chelsea an in sawp tir avangin an beiseina a thamral, kuminah hian an beiseina pahnih hian eng chen nge a thlen dawn hriat a lo ni lo thung.

League lamah chuan Gunners hi an ropui rih lo, hmahruaitu Liverpool nen an inkarah point kua ngawt a awm leh der tawh. Europa League lamah erawh point thum nen bul an ṭan a, zaninah chhunzawm an tum ang. An khingpui tur Belgian club Standard Liege hi an group bika an elpui tura ngaih an nih avangin hneh a pawimawh dawn hle.