CONCACAF hotu hlui hrem

North American football thuneitu sang ber CONCACAF general secretary hlui Enrique Sanz chu thamna sum chungchangah thiam loh chantir a ni a, dam chhung atan football kaihhnawiha inhnamhnawih thei lo tura hrem a ni. 

Sanz hi FIFA, CONCACAF, Caribbean Football Union leh South American Football Confederation hnuaia 2012-2015 inkara inelnaah te thamna sum laa puh a ni a, kum 2015 khan a hna aṭang hian ban a lo ni tawh. FIFA chuan Sanz hi £81,160 (Nuai 70.89) chawi turin an hrem bawk a, "FIFA dan bawhchhiaa thamna sum a lak avangin hremna hi a chungah lekkawh a ni," tiin Colombian football administrator an hrem chhan an sawi. 

Sanz hian CONCACAF-ah hian Chuck Blazer thlakin 2012-ah a hna a chelh ṭan a, a thlak tak Blazer pawh hi thamna sum lak vang thoin dam chhunga football-a inhnamhnawih thei lo tura hrem a lo ni tawh.