Wilder vs Fury : Vawi thum in fight theihna a awm

Tyson Fury promoter Frank Warren chuan a boxer leh Deontay Wilder te inhnek tur contract-ah a vawi thum nana an inhmachhawn theihna dan an ziah tel thu a sawi. 

WBC heavyweight champion Wilder leh Fury te hi February 22-ah a vawi hnih nan an inhnek dawn a, December 2018-a an inhnek hmasak ṭumin chak zawk awm loah puan an lo ni tawh. 

Warren chuan, “Inhneka chak lo zawk chuan ni 30 chhungin rematch-a duhna a thlen thei a, chu chu a chak zawk boxer chuan a pawm ngei ngei a ngai dawn bawk a ni,” tiin an contract chungchang a sawi. 

Gypsy King tia hminglem an pek Fury hi Wilder nen an inhnek hmasak khan vawi hnih a tlu a, mahse tho lehin ṭha takin a fight let - hnehna chang zawkah a inngai hial. 

Warren chuan, “Boxer pahnih inhnek tur ti nghahhlelhawmtu chu an vanglai taka intawng tur an ni hi a ni. Boxer pahnih hian an vanglai hun an hmang mek a, boxing fans tan chuan phur lohna chi a ni lo,” a ti. 

Promoter lar Warren hian Fury leh Wilder inhnek tur hi Muhammad Ali leh George Foreman te inhnek nen a tehkhin a, “Khami ṭuma fight ropui ang tho khan boxer hnek na em em mai leh skills nei ṭha tak inhmachhawnna a ni dawn a ni,” tiin a sawi.