Juventus-in harsatna an nei lo

Champions League Group D inkhelah Juventus-in hnehna chang turin harsatna an nei lo a, an mikhual  Bayer Leverkusen chu 3-0 in an sawp. 

Italian champion tan Gonzalo Higuain, Federico Bernardeschi leh Cristiano Ronaldo ten goal khat ṭheuh an khung a, German club-in a chhanletna tur an nei lo. Inkhel boruak sang lem lem lo takah Juve tlarhnung an khawng ṭha a, Leverkusen hian ball chang tam mah se Juve tlarhnung an ṭhiat thei tlat lo. 

Jonathan Tah tihsual nangchingin Higuain-a'n goal hmasa ber a khung a, Argentine striker finishing a la tawih reng tih hmuh turin a awm. Higuain leh Ronaldo ball inpe vel karah Bernardeschi lo langin goal hnih a khung a, Ronaldo hi Leverkusen keeper  Lukas Hradecky-a'n vawi hnih ngawt a dan avangin goal a khung lo mai dawn niin a lang hman. 

Mahse, Portuguese forward hian kut ruak maia zan mut a duh lo a, hun tawp nan minute hnih chiah a awm tawh tihah an goal thumna a khung. Group D-a an elpui ber Juve chak laia point thum hmuh loh bik Atletico-in an duh lo a, mikhual chak harsatna hmunah Lokomotiv Moscow chu 2-0 in an hneh. Russia-a inkhelah hian Joao Felix leh Thomas Partey chuan goal khat ve ve an khung a, Moscow club-in a chhanletna tur an nei lo.