200m pakhatna Noah Lyles

World Athletics Championships 2019 neih mekah Noah Lyles chuan 200m chu 19.83 seconds chhunga tlan thlengin gold medal a la a, hnehna a chan hnuah Usain Bolt nena khaikhin a duh loh thu a sawi.

Thawhlehni zana intlansiakah Canada tlangval Andre De Grasse chuan 19.95 second chhunga thlengin silver medal a la, Ecuador aṭanga inlan Alex Quinonez chuan 19.98 chhunga thlengin bronze medal a la ve thung.

Kum 22  mi American tlangval Lyles chuan, "Kumin chhung hian world champion nih tumin theihtawp ka chhuah nasa hle. Phone-ah hian chhinchhiahna ka siam a, motor ka khalh lai leh ka hriat chhuah apiang hian a ṭha ber ka nih theih nan keimah leh keimah ka infuih ṭhin.

"Usain Bolt chhuak thar tia min sawi tawk an awm tih ka hria, Jamaican legend nen chuan sawi pawlh chi ka ni lo. Ka nihna anga min pawm thei tawp a nih chuan ka tan a hlu em em zawk a ni," tiin a sawi.Lyles hi Bolt nena khaikhin theih tak pakhat chu a ni ve tho, kum 22 mi an nih lai ve ve chuan Lyles hi 100m leh 200m-ah a tlan chak zawk. Mahse, an vanglaia an tawn san lai berin ang chen nge an thlen theih tih chu a pawimawh lai a ni ang.