Real-in Brugge lakah VAR puihna mamawh

Santiago Bernabeu-ah Club Brugge laka an si phurh sutna goal Real Madrid-in an lawm chiam a, chu chuan he club dinhmun dik tak a hrilhfiah. 

Thawhlehni zan khan Champions League group stage match-ah Real Madrid-in Belgian club  Club Brugge an mikhual a, first half chhungin goal hnih an chhuah hman. Mahse, VAR puihna nen Real-in second half-ah goal hnih an khung a, point khat an hlawh chhuak. Match hmasa zawkah Paris St-Germain an ngam loh tawh avangin point khat chiah an la nei. 

Group A inkhel dangah PSG hian 1-0 in Galatasaray an hneh a, Mauro Icardi chuan French club tana a goal hmasa ber a khung. 

Bernabeu-a inkhelah rin loh takin Brugge lamin goal an khung hmasa zawk a, minute kuana lekah Emmanuel Dennis chuan ball control a tumna lamah a ke chhep sualin a khung daih! Minute 39-na a ni a, kum 21 mi Dennis bawk hian an goal hnihna a khung - ball a tlanpuina lamah tlu ṭep mah se 'cial' zetin an goal hnihna hi a khung. 

Dennis goal khung danah vanneihna a tel niin lang mah se chesual chunga goal a khung hian free takin a awm ve ve a, Real tlarhnung an demawm. Nigeria tana vawi khat chiah la inlan striker hian a goal khung hi Cristiano Ronaldo goal khung lawm dan angin a lawm a, Bernabeu-a Real fan-te an hawihai!

Zinedine Zidane-a'n Bernabeu-ah tlawm a duh lo. Second half-ah goalkeeper Thibaut Courtois a la chhuak a, Belgian keeper aiah PSG aṭanga an hawh Alphonse Areola a luhtir! Minute 55-naah Sergio Ramos hmangin si phurh an sut ṭhen a, Spanish defender hi ball a tauh luh dawn hian a offside niin lang mah se VAR chuan offside-ah a ngai lo. 

Minute 84-naah Brugge captain Ruud Vormer chu a yellow card pahnihna avangin hnawhchhuah a ni a, a freekick chawi Toni Kroos-a pet chu Casemiro chuan si phurh sut nan a tauh lut. Hun tawp hnaih lamah Real tan defender Ramos chu centre forward hial a ni tawh a, mahse an duh ber point thum erawh an hlawh chhuak zo chuang lo. 

Real boss Zidane chuan, "Goal hmasa pahnih kha chu fiamthu ang lek a ni a, a bak sawi thui tur pawh ka nei lo. Point thum hmuh tumin kan khel a, a tawpah point khat kan hlawh chhuak hram a ni," a ti. French manager chuan sawi zawmin, "Kha ai khan goal hmaah hriam zawk ni ila chuan goal kan khung hmasa zawk ang," a ti a, Raphael Varane tauh ṭha tak Simon Mignolet-a'n ṭha zeta a lo dan te kha a ui khawp ang. 

Inkhel pumpui thlir erawhin Real vanneihna hmuh hmaih theih a ni lo. Dennis-a'n minute 54-naah hattrick siamna remchang a nei a, Areola chuan ṭha zetin a dansak. Substitute Siebe Schrijvers chuan Brugge tan hun pek belhah chance a nei bawk a, mahse point thum hlawhchhuah theihna hun an neih hi uiawm takin a khawhral. 

Match hmasa berah 3-0 in Real an sawp tawh a, PSG-in Galatasaray mualah chak loh an duh lo - Icardi goal hmangin 1-0 in an chak. PSG hian Neymar chu hremna avangin an chhawr thei lo a, Edinson Cavani a inhliam a, Kylian Mbappe lah damkawr a ni. 

Mahse, French club hian Ángel Di María, Icardi leh Pablo Sarabia te tlarhmaah an la inkawptir thei a, Radamel Falcao hoa khel Galatasaray tan tawh an la khirh hle. Inter aṭanga loan-a an hawh Icardi-a'n club tana a goal hmasa ber khung nan Turkish club a hmang a, Argentine striker goal khung lai kan hmu zel ang.