Man United-in Stamford Bridge luhchhuah

Manchester United-in Thawhṭanni zan khan Champions League khel tura an elpui Chelsea 2-0 in an hneh a; Ole Gunnar Solskjaer hoten tun season chhungin Frank Lampard hote vawi thum an hnehna a ni.

United tan Anthony Martial leh Harry Maguire ten an khung a, Chelsea tana substitute pahnih Kurt Zouma leh Olivier Giroud te khung erawh VAR hmangin pawm a ni lo. Blues manager Lampard-a'n VAR thutlukna chuan mipui thinlung a tih nat thu a sawi.

Chelsea leh Manchester United inkhel a nih tawh chuan hmuhnawm awm tura ngaih a ni a, tun hma angin nomawi inchuh zingah tel lo mah se Thawhṭanni zan inkhel erawh ṭan phat aṭangin a hmuhnawm.

Mualneituin Reece James hmangin chance ṭha an nei hmasa a, Willian leh Michy Batshuayi hmangin United tlarhnung an rum ṭhaih nasa hle. Amaherawhchu Solskjaer-a'n Chelsea goal nawr ven nan defender panga a hmang a, hun rei tak inhliam vanga khel thei lo Eric Bailly pawh a ṭangkai nghal hle.

United pawhin chance insiam ve thoin keeper Willy Caballero tan harsatna siam thei meuh lo mah se minute 45-naa Martial-a tauh erawh Argentine keeper tan dan theih rual a ni lo. French forward tauh luh tur hi Aaron Wan-Bissaka cross a ni a, English right back hi goal venhim kawngah pawimawh.

Second half-ah pawh Chelsea bawkin bul an ṭan fuh a, Pedro goal khung tur chu AWB-a'n a dang hman hram. Minute 55-naah substitute Kurt Zouma-a'n siphurh a sutah a ngai a, Blues defender hian a goal khung lawm hman viau mah se VAR hmanga ennawna nih hnuah Cesar Azpilicueta-a'n Brandon Williams a nam avangin pawm a ni lo.

United midfielder thar Bruno Fernandes-a'n freekick aṭangin goal ban a pet per a, hemi hnu hian a corner pet chu Maguire-a'n ṭha zetin minute 66-naah a tauh goal.

Blues-in Olivier Giroud an luhtir a, French forward hian Mason Mount-a cross a tauh goal - VAR hmanga en nawn a nih hnuah Giroud-a ke hmawr a offiside avangin pawm a ni lo. Chelsea midfielder Mount-a'n freekick aṭangin goal ban a pet per ve leh a, goal erawh hmuh tur a awm tawh lo, 2-0 in inkhel a tawp.

Liverpool-in Champions League an khel dawn tih a chiang tawh a, Manchester City leh Leicester City te pawh an point aṭanga thlir chuan dinhmun ṭhaah an awm. Club lian Chelsea leh Manchester United bakah Tottenham Hotspur, Sheffield United leh Wolverhampton Wanderers ten hmunruak pakhat an inchuh a, Man City hrem avangin hmunruak pahnih a awm thei a, UCL khelh tum boruak a sang hle

Manchester United manager Ole Gunnar Solskjaer chuan, "Chelsea nen kan inkarah point thum chauh a awm ta a, Champions League khel turin beiseina kan nei. Goal kan chhuah lo a, kan tlarhnungah pawh hmasawnna a awm," tiin an khelh danah a lungawi thu a sawi.

Chelsea manager Frank Lampard chuan, "Palinaah kan la awm mek. Season a inṭan chiah e," tiin Champions League khelh tum zingah an dinhmun a ṭhat thu a sawi.

MINUTE  21 : Mual sirah Maguire-a'n amah nek tlutu Batshuayi chu a tlawh lui hram a, thil thleng hmu chiangtu Chelsea technical area-a ṭhuten red card beisei mah se pek a ni lo.

Lampard - Ka ennawn leh a, VAR awm chhan tak niin ka hria. Maguire kha red card tur a ni a, sawiselboa red card hmu tur a ni, inkhel thlak danglam thei tur a ni.

Solskjaer : Maguire a vannei maw? Batshuayi kha a foul hmasa a, Belgian forward khan a delh theih avangin Maguire kha a inveng mai a ni.

Maguire : Min delh dawn emaw ka tia, in ven nan ka ke khai chauh a ni. Batshuayi bulah pawh ngaihdam ka dil a, referee-in thil kal dan a hmu thiam kha a fakawm.

MINUTE 56 : Chelsea defender Kourt Zouma-a'n corner aṭanga ball kal chu a khung a, VAR hmanga ennawn a nih hnuah Cesar Azpilicueta-a'n William a nam avangin pawm a ni lo. Chelsea captain hian William hi a nam hmain Fred-a'n a nam ve bawk.

Azpilicueta : William chu ka nam a, namtu ka neih vang a ni. Min nam kha penalty-ah ka ngai lo a, mah se min nam avang chauhin William ka nam. 

Lampard : Azpilicueta chet dan kha a chiang tawk lo - namtu a nei bawk.

Solskjaer : Goal an pawm loah khan Fred-a'n tihsual a neih ka hmu lo.

MINUTE 77 : Mason Mount-a cross chu Giroud-a'n mawi zetin a tauh goal a, VAR hmanga ennawn a nih huah Giroud-a ke (boot) a offiside.

Lampard : Ka duh emaw duh lo emaw ke hmawr offside chu offiside a ni tho. Amaherawhchu fan-te thinlung erawh a ti na a ni.

Solskjaer : Ka inkhelh hun laia VAR a awm lo kha ka lawm. Giroud ke kha chu a offiside miau si a, a zakhnuai em a ni lo a, a zia.

•    N'Golo Kante a inhliam a, minute 12-na lekah Mason Mount-a'n a thlak. French midfielder hi a malpui tihrawlah hliam a tawrh avangin a chawlh rei 

a rinawm.

•    Injury time-ah Odion Ighalo a rawn lut a, Manchester United tana Nigerian inlan hmasa ber leh Premier League-a United tana player inlan thei 200-na a ni. Watford forward hlui hian hun rei lote chhungin chance ṭha a nei hman a, Chelsea keeper Willy Caballero-a'n 

a dansak.

•    Frank Lampard-a'n pound maktaduai 71 man goalkeeper Kepa Arrizabalaga aiah kum 38 mi Willy Caballero a ring zawk a, Chelsea-in Argentine keeper an lakluh hian second keeper tura lakluh a ni.