Chanmari lakah Chhinga Veng vanduai

Mizoram Premier League Season 8 chu Santosh Trophy qualifying round vanga MPL chawlh a nih hnuah nimin khan khelh chhunzawm a ni a, Chhinga Veng leh Chanmari te 2-2 in an inhnehtawk - Chhingcows an vanduai takzet.

Lammual inkhel hmuhnawmah Chanmariin Lalrammuanpuia hmangin hma an hruai a, Chhinga Vengin MC Malsawmzuala goal hnih hmangin an lehthal. Chhingcows hi chak tura an inngaih hnuah an defender Vanlalchhuanga'n anmahni goal-ah a tauh lut.

Goal khung thei MC-a

Chhinga Veng tan Siaha tlangval MC-a'n goal hnih a khung tawh a, Chanmari nen erawh bench-ah dah a ni. Second half-ah MC-a hi minute 60-naah rawn lutin a hun takah a hmun takah awmin minute khat pawh tling loah goal a khung nghal.

Chanmari tana bench aṭanga rawn lut H. Lalmuankima penalty chawi chu MC-a hian goal-ah a chantir leh bawk a, minute 30 chauh khelmualah hun hmang mah se a thawh hlawk hle. Tun season-ah goal li a khung der tawh.

Tihsual a pawi

Chhinga Vengin inkhel an thunun a, point thum an hlawh chhuah loh chhan erawh an tihsual vang a ni.

K. Lalthlahlova tihsual chu pawi tham la ni lo mah se a kawppui Vanlalzuidika'n a pet ṭhelh leh avangin Apuia tan duhthusam a ni a, Chanmari forward hian a hun ṭha hi goal hmahruai khung nan a hmang.

Chhingcows-in MC-a goal hnih hmangin Chanmari an lehthal a, S. Malsawmtluanga hoten si an phur hnuah an nawr na thei lo. Amaherawhchu Chhinga Vengin goal khat an 'khilai' a, tibuaitu nei lo Vanlalchhuanga chuan minute 87-naah keeper Lalruatpuia 'pass' a tum chu an lamah a tauh lut.

Chhinga Veng hi match thum an khelhah chak an la nei lo a, chu tih rualin chak loh an neih loh avangin point thum an hlawh chhuak tawh. Chanmariin point khat hlu tak an hlawh chhuak a, point li hmuin hmahruaitu Mizoram Police hnuai chiahah an awm.