Tlai dar 4-ah AFC Vs Police
Mizoram Premier League Season 8 match hnih khelh tawha la chak ve ve Mizoram Police chuan vawiin tlai dar 4:00 hian hneh loh la tawng lo I League club Aizawl FC an hmachhawn dawn.
Police hian MPL ṭan hnua a vawi khat nan season ṭantirhah nomawi lian tham an chawi a, MFA Super Cup-ah an champion. Amaherawhchu, I Day Football match hmasa berah Police an mualpho nghal a, Aizawl FC-in 5-1 in an sawp.
Lalbiaksanga Colney hoten nomawi pahnihna an beisei laiin I Day Football group stage-ah an tla. Police tan Aizawl FC nena an inkhel tur hi MPL match a ni satliah lo a, mualphona hliah khuhna hun ṭha a ni thei ang. Chutihrualin Aizawl FC hi namnul ngawt thei a ni lo a, team enkawl tura I League thlenga tawnhriat nei ṭha Standly Rosario an lakluh hian thu a sawi thui hle. AFC hian foreigner ṭha pahnih MPL best player ni lai Alfred Kemah Jaryan leh Juuko Richard Kassaga te an kawl bawk.
MPL champion lai Aizawl FC hian MPL8-ah hneh la nei lo mah se match hnih an khelh tawhah team ṭha Chhinga Veng leh Electric Veng an hmachhawn a, point khat ve ve an hlawh chhuak. I League club hian Police hneh nawn an tum ang.
ROUND 3
Vawiin inkhel tur
Aizawl FC 04:00 PM Mizoram Police
FC Venghnuai 07:00 PM Ramhlun North