Venghnuai nge lian Ramhlun North

MPL kaithar FC Venghnuaiin zanin dar 7:00 hian Ramhlun North an hmachhawn dawn a, inkhel nghawng nei lian a nih avangin player bakah entu thlengin an pawimawh.

FC Venghnuai hian match hmasa pahnihah Electric Veng leh Chhinga Veng an chelh a, Ramhlun North-in Chanmari FC hneh loin bul ṭan mah se an match hnuhnung berah Chawnpui FC 3-0 in an hneh.

Club pahnih hi I Day Football-ah an inhmachhawn a, Vanlalthanga goal hmangin Venghnuai 1-0 in an chak. MPL kaithar hi an buk rit hret nachungin Ramhlun North hi an insiamṭha viau tawh a, captain Jesse Vanlalmuana a la che ṭha tluang bawk.

Lunglei Zobawk tlangval hian MPL match hnih khelh tawhah goal a khung ve ve a, Mizoram tana koh niin Arunachal Pradesh nen match hmasa berah goal awmchhun a khung nghal. Zanin hian Venghnuai tlarhnung tan Jessy hi ven uluk a ṭul ang.

Kumin MPL hi team intluk tawk ber ṭuma ngaih a ni a, vawi khat chak loh a pawi. Venghnuai leh Ramhlun North te hi an intluk tawk avangin point ruk inchuhna inkhel tih hialin a sawi theih.