Anfield-ah hlauthawng chungin Reds chak

Champions League-a sulhnu chhuan tur nei lo Red Bull Salzburg-in Anfield-ah champion lai Liverpool an chhaih mangang a, a tawpah erawh an vannei zo ta lo - 4-3 in an tlawm.  

Nilaini zan inkhelah Reds hian si thum an khung hnuah an sut zawh tir vek avangin an dinhmun a derthawng hman a, minute 69-naa Mohamed Salah goal khung chu an tan chhandamna a ni. Group E inkhel dangah Napoli-in Genk an lenchilh a, team pahnih hi goal khung loin an inhnehtawk. 

Kum 2014 hnuah Anfield-a European match an khelhin Liverpool an la tlawm lo a, Nilaini zana minute 37 hma lama an khelh dan en chuan thawnthu a pangngai dawn niin a lang. Premier League hmahruaitu tan Sadio Mane, Andrew Robertson leh Salah ten minute 36 chhungin goal an khung a, target-a vawi li shot an neih zinga pathum a lut. 

Liverpool khelh dan enin awlsam takin an chak dawn niin a lang a, mahse Austrian club huaisenin ngaihdan dang an nei. 

Austrian league match kua an khelh tawha goal 40 khung tling tawh Salzburg-in Anfield a nih tak avanga inthlahrun an tum lo - Hwang Hee-chan chuan chiang zeta Virgil van Dijk a bum hnuah an goal hmasa ber a khung. 

Second half-ah Salzburg an hmuhnawm chhunzawm a, Takumi Minamino leh Erling Braut Haaland ten si phurh an rawn sut zo!

Reds an harh zawk a, na takin Salzburg an nawr - Liverpool tlarhma nawr dawl zawh chu thil harsa a ni tih a lang chhuak a, Salah-a'n chakna goal khungin Anfield an lam. 

Reds tlarhnung pherh a lang chhuak leh ta a, tun season-ah Burnley, Sheffield United leh MK Dons lakah chiah goal an la chhuah lo - Alisson an ngai. 

Alisson thachhang dawltu Adrian khel ṭha ṭhin mah se Alisson-a'n tlarhnung player-te inrintawkna a pek ang kha a keng tel ve lo a, chu chu an game-ah a lang chhuak ṭhin. Joel Matip-a'n hliam vangin Salzburg a hmachhawn thei lo a, hei hi Nilaini zan bika an buaina belhchhahtu a ni - Joe Gomez-a'n a hmun ruak a luah zo lo. 

Salzburg chak zo lo mah se fak an phu - goal thumna khungtu Haaland kha kum 19 mi chauh a la ni a, dam lohna avangin bul ṭan lo mah se a luh hnuah a theihna kan hmu - tun season-ah match 12 khelin goal 18 a khung ta. 

Kum 24 mi forward Minamino kha Japan international a ni a, tun season match 12-ah goal ruk a khung tawh. Hee-chan hming lam hmaih a thiang lo a, South Korean striker hian tun season-ah match 10 khelin goal ruk tho a khung tawh. 

European football-ah player pathum thiamna kan hmu tawh a, season tharah club lian zawk an pan a nih pawhin a mak lo ang.