Suarez-a'n Barca a chhan

Barcelona tan Lionel Messi-a'n bul a ṭan leh thei tawh a, Nilaini zan khan Nou Camp-ah Inter Milan 2-1 in an lehthal. Catalan club chakna erawh Luis Suarez goal hnih a ni.

Champions League group G inkhel dangah Borussia Dortmund-in Sinobo Stadium-ah mualneitu Slavia Prague 2-0 in an hneh a, German club tan Achraf Hakimi-a'n goal hnih a khung.

Barcelona-in Inter Milan hmachhawn turin tlarhmaah Messi, Suarez leh Antoine Griezmann te an tlar a, goal khung hmasa zawk erawh Antonio Conte hote an ni thung.

Minute hnihna lekah Alexis Sanchez-a ball pek chu Lautaro Martinez-a'n Spanish defender Gerard Pique venna karah goal-ah a khung. Inter-in Nou Camp-a an goal khung vawi khatna a nih avangin beisei an neih san phah hle.

Catalan club-in ball an chang tam a, chutihrualin Conte hoten goal an venhim ṭhat bakah a khat mawi tawkin Barca tlarhnung tan hna an siamsak. Inter hi malpui hliam vanga Romelu Lukaku tel lo chungin goal hmaah an hlauhawm thawkhat hle.

Second half-ah erawh player ṭha danglamna a lang a, minute 58-naah Suarez chuan substitute Arturo Vidal aṭanga a ball hmuh chu box pawn chiah aṭangin a volley lut - Inter tlarhnung dem a harsa. Conte awmze nei thlapa player a rem chungin Messi erawh dan theih a ni lo a, Inter tlarhnungin Barca captain hi veng viau mah se fing takin Suarez hnenah ball pein minute 84-naah Uruguay forward hian a 'class' san zia pholan nan a hmang. 

Barca manager Ernesto Valverde chuan, "Inter-in Serie A match an khelh tawha an chak vek hi an vanneih vang a ni lo a, an ṭha hrim hrim. Kan inkhelh ṭumah pawh hian goal an khung hmasak bakah tlarhnung an hnawh phui ṭha hle. Second half-ah erawh kan khel ṭha a, counter attack hmanga min nawr tur kan ven hneh bakah goal kan khung," tiin team ṭha tak an hneh thu a sawi.

Inter Milan manager Antonio Conte chuan, "Barcelona aiin point hmuh kan phu zawkin ka hria. Kan khelah lawmna tur a awm a, amaherawhchu point hmu loa kan haw tur erawh pawm a harsa. Kan chak miau loh avangin kan lawm tur a ni lo," tiin khel ṭhat a tawk loh thu a sawi.

UCL group stage-ah group G hi ngaihven hlawh lo bera sawi theih a ni a, knockout lut tur erawh hriatthiam a har. Ligue 1 club Lyon-in Memphis Depay leh Martin Terrier te goal hmangin RB Leipzig chu khualmualah an hneh.

Russian club Zenit-in an mualah Benfica 3-1 in an hneh a, Portuguese club Benfica hian match hnih an khelh tawh aṭangin point an la hlawh chhuak lo. Zenit leh Lyon hian point li ve ve an hmu tawh.

Zenit tana Artem Dzyuba leh Sardar Azmoun te goal khung inkarah Benfica player Ruben Dias-a'n an lamah a tilut a, goal thum luh hnuah Portuguese club-in Raul de Tomas hmanga goal an khung ve chauh avangin chak phu zawk an chak.