Indian player hmabak awlsam dawn lo

October 22 aṭanga khelh tur Badminton French Open inkhel tur chu pawh fel a ni a, Indian shuttler rualte hmachhawn tur an awlsam dawn lo hle.

World champion PV Sindhu chuan vawi nga a hneh tawh Michelle Li a hmachhawn nghal dawn. World number 9 Li lakah hian tun hmain vawi hnih a tlawm tawh. China leh Korea Open-a beisei phak lo Sindhu tan fimkhur a ngai ang.

Khup hliam dam hlim Kidambi Srikanth pawhin a match hmasa berah world number 2 Chou Tien Chen a hmachhawn dawn, an intawn hnuhnung pathumah Srikanth hi a chak lo vek.

India tlangval hian 2017 khan French Open title hi a la a, kuminah erawh rinkai a ni phak lo. Chen-a lakah chak tura rinkai ni lo mah se 2014 Hong Kong Open-ah khan vawi khat chu a lo hneh tawh avangin beisei bo tawp chu a ni bik lo.

London Olympic bronze medalist Saina Nehwal chu seeded pariatna pek a ni a, ani hian Hong Kong nula Cheung Ngan Yi a tum nghal dawn. Mipa singles player HS Prannoy hmaah world number 1 hlui Viktor Axelsen a ding nghal dawn bawk a ni.