China Open-ah Champion lai a tlang zel

China Open hmeichhe singles champion lai Caroline Wozniacki chuan nimin khan quarterfinal a in vaw kai a, a nomawi kawl lai humhim turin match thum chak bak a mamawh tawh lo.

Beijing-a inkhelah world number 19 Wozniacki hian Katerina Siniakova chu darkar khat leh minute 37 chhungin 7-5, 6-4 in a hneh, hnehna chang tur hian a service vawi nga hloh ve mah se a khingpui hi vawi sarih a chhuhsak let theih a vangin a ding chang ta zawk.

Wozniacki hi tun hnai season 12 chhung chu WTA hnuaia inelna pakhatah tal a champion ziah, kuminah pawh tih hlawhtlin leh ngei a tum. Australian Open champion hlui hian a match lehpekah chuan Daria Kasatkina leh Ekaterina Alexandrova te inkhela chak zawk a hmachhawn leh ang.

Inkhel dangah seeded palina Naomi Osaka pawh a chak. Japanese nula hian Wuhan Open finalist Alison Riske chu 6-4, 6-0 in a hneh. American nula Riske hian set khatnaah 4-2 in hma a hruai fal a, mahse game hnuhnung 10 zet chu Osaka-in la zawnin a chak tlang daih.

Kum 21 mi Osaka hi kar hmasa mai khan an rama inelna Japan Open-ah a champion. Hard court hi a inkhelh thiamna hmun a nih avangin Grand Slam vawi hnih champion tawh hian China-ah pawh beiseina a nei sang hle.