Anfield-ah team tlo Leicester leh an pu Rodgers

Zanin dar 7:30-ah Liverpool-in an boss hlui Brendan Rodgers an mikhual dawn a, Anfield-in duat taka lo enkawl tawh ṭhintu chungah zahngaihna lantir a tum lo ang. 

Rodgers hian Reds chhuahsana Celtic a pan hnuah Leicester City a enkawl leh tawh a, Claudio Ranieri chhuah hnua ngaiawh leh tawh lo club hi English club hmuhnawm ber pawlah a chhuah leh tawh. 

Liverpool hi tun season Premier League match sariha la chak vek awmchhun an ni a, Foxes tan len luhna atana thlanawm tak an ni hran lo. Mahse, Rodgers-a naute hi Reds ang thoa goal khung thiam an ni a, an match hnuhnung pahnihah goal kua an khung avangin an 'mood' fuh vanglai tak a ni. 

Liverpool hi Champions League khel zo hlim an nih avangin an chau ang tih a chiang a, player tlan chak leh tharum ngah Jamie Vardy tan 'vulna' hun ṭha a ni. Kum 32 mi striker hian league match sarihah goal nga a khung leh der tawh a, a kum tam anga ngaihthah chi a ni lo tih chu khelmuala a inkhel en ṭhinten an hria ang. 

Liverpool boss Jurgen Klopp pawhin Vardy theihna a chiang a, "Red Bull Salzburg ang khan kan khel leh a nih chuan Rodgers hian goal nga tal khung turin Vardy a beisei mai ang," a ti a, a naute a vau lawk. Reds hian Anfield-a Salzburg an mikhualna inkhelah goal thum khung hmasa zet mah se si phurh an sut zawh tir a, a tawpah Mohamed Salah chuan a chhanhim hram - thlen nawn tir chi a ni lo. 

Kum 2014 khan Liverpool-in Premier League nomawi an khawih thuak a, fan-te pawhin an phur vanglai tak an tawng - khatihlaia an coach chu Brendan Rodgers a ni. Reds manager hi October 2015-ah ban a ni a, Klopp-a'n a thlak zui. Rodgers chuan, "Lawm lohna leh Liverpool huatna ka nei lo a, thutlukna an siam fuh alawm!

"Champions League nomawi an chawi pawh khan ka lawmpui em em a, player-te leh Jurgen-a hnenah pawh lawmpuina message ka thawn a ni," a ti. Celtic-a pan hnua Scottish football-a nomawi chawi theih zawng zawng chawitu coach hian passing game leh attacking football chu a tuipui ber a ni a, zaninah a club hlui a nawr ngam loh ring suh. 

Salzburg lakah Liverpool fan-ten an tana Joel Matip lo ṭangkaizia an hre chhuak a, kum 28 mi defender hi tlarhnunga Virgil van Dijk kawp turin zaninah chuan a lo kir rin a ni. Goalkeeper Alisson Becker-a'n dam tawhin inhre mah se Klopp-a'n Brazilian keeper chhawr nan a la hma hretah a ngai a, Adrian bawkin si ban a nghak ang. 

Reds hian midfield-a chhawr turin Naby Keita, Fabinho, Jordan Henderson, James Milner, Alex Oxlade-Chamberlain, Georginio Wijnaldum leh Adam Lallana an kawl a, an buai lohna lai tak a ni. Tlarhmaah Roberto Firmino, Salah leh Sadio Mane bawk inkawp leh tura beisei an ni a, anni pathum hian hna tlin loh lai an nei meuh lo. 

Foxes an ṭha 

Rodgers-a'n top four sawi rik nan a la hma hretin hre mah se Leicester hi table-ah pathumna an ni mek a, Reds nen an inkarah point sarih chiah a awm - point lia sawr zim theihna hun an nei a, bawhpelh an duh lo ang.

Ben Chilwell leh James Maddison ngawt pawh hi football ngaina chin inti tan chuan thiam lo tih chi an ni lo a, midfielder Wilfred Ndidi, Youri Tielemans leh Harvey Barnes-te hi Reds game dang chat turin an ṭha tawk. Hriat tel atana ṭha chu Foxes hian 'Big Six' huang chhungah team pathum an hmachhawn tawh a, Manchester United (1-0) lakah chiah an chak lo - Chelsea an draw (1-1) a, Tottenham Hotspur (2-1) an hneh.  

Liverpool an hneh a nih ngat chuan inrintawkna pek belhchhahtu ṭha tak a ni dawn a, top four-a awm reng tum tan a pawimawh. 

Rodgers tan Liverpool-in an ban hnua Anfield-a a kir lehna hmasa ber tur a ni dawn a, Northern Irish coach tan game danglam bik a ni dawn. Mak ve angreng tak chu Klopp-a inluah hi Rodgers-a ta a ni! Foxes manager hian Liverpool hnaih chet Formby-ah in nuam tak a nei a, hei hi Klopp-a luahtir!

Rodgers chuan, "An lakah rilru chhia ka pu lo, Klopp pawh ka in ka luahtir alawm," tiin a sawi a, Leicester coach a nihna anga Anfield-a chak tum mai tur a nih thu a sawi. Mahse, 'heavy metal football' hmanga football khawvel ngam tumtu, a vawi khat nana Premier League-a Liverpool champion pui tumtu Klopp hian a in neitupa lakah ṭhat a chhuah lo ang - a hmuhnawm dawn e!