Juve legend Marchisio a chawl

Italian champion Juventus legend Claudio Marchisio chuan inkhelh a chawlhsan thu a puang a, kum 33 mi lek nichungin a ballboot a khai fel ta. 

Italy tana vawi 55 inlan hman midfielder hian season hmasa ṭan dawn khan Juve chhuahsanin Zenit St Petersburg a pan a, hliam vanga a buai chungin Russian Premier League nomawi a chawipui tho. Russian club nen hian kum hnih atan inrem mah se inhriatthiam tawnnain a contract tih tawp a ni a, club dang hawi tawh loin chawlh a puang zui ta a ni. 

Juve midfielder hian kum sarih mi lek a nihin Turin club hi a zawm a, league nomawi pasarih a laksak bakah Italian Super Cup (3) leh Italian Cup (4)-ah a champion pui a, Italy chu kum 2012 khan Euro final a luhpui bawk. Marchisio chuan, "Turin a seilian, Juve tana khelh beisei ṭhin ka ni a, ka duhthusamte a tak ka chantir a ni," tiin a career-a a lawm zawk thu a sawi. 

Italian midfielder hian kum 2006 khan Juve tan a professional match hmasa ber a khel a, Empoli-ah loan-in a chhuak zawk tih loh chu Zenit hma zawngin club dang tan a khel lo. 'The Little Prince' tia hminglem an pek hian kum 2016 khan a khupah hliam hlauhawm a tuar a, hemi hnu hian ngai a awh leh tawh lo.