India leh England inhnehtawkin an tawp

FIH Olympic Qualifier khel tura inbuatsaih mek India nula hockey khel thiamte chu nimin tlai khan England nen 2-2 in an inhnehtawk a, match nga khelh tur chu khel zoin ram pahnih hi an intiat tawk.

Vawi nga an inkhelhah ṭum khat ve ve hnehna an chang a, match pathum dang chu an inhnehtawk vek. India hi kualmuala inlan an nih avangin an result hi lawmna tur a ni ang a, player ten tawnhriat an neih hnem phah bawk avangin coach Sjoerd Marijne chuan a lawm thu a sawi.

Match hnuhnung berah India hian 2-0 in hma hruai mah se a tawp lamah an tlarhnung a pawp. Navjot leh Gurgit te goal khung chu England lamin Elizabeth leh Anna te hmangin an sut. India hi nakkuma neih tur Olympic atan qualifier khel turin an tling tawh a, November thlatir hian United States nen an intawng ang. Tun hnaiah India tan Lalremsiami Hmar a inlan ziah a, England rama an zin chhuah pawh hian player pawimawh niin goal khat a khung.

Game 1    India 2 - 1    England

Game 2    India 1 - 1    England

Game 3    India 0 - 0    England

Game 4    India 1 - 3    England

Game 5    India 2 - 2    England